Komisioni Ligjeve ka rrëzuar dekretin e presidentit Ilir Meta që ktheu për rishqyrtim në Kuvend ndryshimet në ligjin për Pushtetin Vendor.
I pranishëm në Komision, këshilltari i presidentit Bledar Dervishaj tha se këto ndryshime në ligjin për qeverisjen vendore cënojnë procesin e vendimmarrjes së këshillave bashkiakë.
“Ky projektligj është shqyrtuar në dy komisione. Presidenti e shqyrtoi ligjin duke iu përmbajtur përmbajtjes së akteve. Ka bërë një vlerësim të kujdesshëm në raport me interesin publik. Dispozitat e nenit 1 janë një hap pozitiv. Referuar nenit 3 dhe 4, gjatë shqyrtimit janë propozuar disa ndryshime që jane pranuar dhe që synojnë procesin vendimmarrës….. janë ndryshime të pajustifikuara sepse nuk garantojnë mbrojtjen e interesit publik. Nëpërmjet këtyre ndryshimeve ulet kontrolli i shtetit. Po krijohet nje kompetencë e re e autoriteteve vendore”, shprehet Dervishaj.
Ndërkohë reagimi i i këshilltarit të presidentit është kundërshtuar nga relatori Bashkim Fino.
Fino shprehet se presidenti Meta e ka marrë personale me të, pavarësisht se e di shumë mirë procedurën ligjore që ndiqet në raste të tilla.
“Më vjen keq se në të gjithë relacionin po vërej me keqardhje që gjithë relacioni është drejtuar kundër relatorit. Me çfarë duket presidenti e ka personale me mua, presidenti e di si veprohet kur vjen një nismë.
Presidenti i nderuar ka qenë 4 vjet kryetar kuvendi, i di shumë mirë procedurat. Në cdo komision ka një relator. Është komisioni dhe relatori që bëjnë ndryshimet e nevojshme. Këtë praktike ka ndjekur Ilir Meta, këtë po ndjek dhe une. Jam relator kushtetues dhe i drejtë.
Jam dakort që presidenti ështe dakort per ngritjen e zyrave të Diasporës. Kur bëhet iniciator qeveria ne bëme disa ndryshime. Nuk e humbet të drejtën e pronësisë bashkia, i humbet pronësia vetëm kur shitet. Njësitë vendore jane tërësisht autonome, dhe në këto kushte për konstatimet e mësipërme ne duhet ta rrëzojmë dekretin e presidentit”, shprehet Fino.
