Kombëtarja Shqiptare ka udhëtuar sot drejt qytetit të Strumicës ku ditën e nesërme në orën 20:45 do të luajë ndeshjen eliminatore kundër Maqedonisë, e vlefshme për botërorin Rusi 2018.
Kombëtarja u largua nga hoteli në Shkup rreth orës 10 të paraditës së sotme dhe për rreth 90 minuta kanë mbërritur në qytezën kufitare me Bullgarinë ku do të zhvillojnë edhe seancën e fundit përgatitore nën drejtiin e teknikut Panucci.
Ajo që ra në sy, kur kombëtarja doli nga hoteli ishte prania e forcave të sigurisë që monitoronin në çdo moment lëvizjet e lojtarëve për t’u siguruar që gjithçka të kalonte e qetë dhe pa incidente.
Në orën 18:30 trajneri Panucci dhe kapiteni Agolli do të flasin në një konferencë për shtyp dhe në orën 19:00 skuadra do të zbresë në fushën e blertë për të zhvilluar seancën e fundit pregatitore përpara përballjes me Maqedoninë.
