“E rëndësishme është që Dibra të përfaqësohet në nivelet më të mira dhe besoj se dibranët do të dinë të bëjnë zgjedhjen e duhur”
Nuk duket se do të ketë një marrëveshje mes PS-së dhe LSI-së në zgjedhjet për Bashkinë e Dibrës. Megjithëse nuk ka ende një kandidaturë zyrtare të së majtës për këtë bashki, nuk ka ndërkohë asnjë shenjë të bashkëpunimit mes dy partive për të dalë me një kandidat të përbashkët në garën e 11 shtatorit. Deputeti Përparim Spahiu, i cili u përjashtua nga LSI (formalisht me sa duket), pak javë më parë, thotë se për të nuk ka shumë rëndësi marrëveshja e koalicionit, por përfaqësimi në nivelet më të mira të mundshme të Dibrës, pavarësisht se kujt partie i përket kandidati fitues.
Në një deklaratë për 27.al, Përparim Spahiu sqaron: “Unë jam deputet i Dibrës dhe ajo që më intereson më shumë janë projektet zhvillimore të saj. E rëndësishme është që Dibra të përfaqësohet në nivelet më të mira dhe besoj se dibranët do të dinë të bëjnë zgjedhjen e duhur”.
Raportet e vështira në koalcionin PS-LSI duket se do të jenë një tjetër faktor negativ për të majtën në këto zgjedhje. Kjo problematikë i bashkohet imazhit të shkatërruar të Rilindjes në Dibër përmes kryebashkiakut Shukri Xhelili, i cili e la këtë detyrë pas skandalit seksual që u publikua në media. Ndërkohë që përballë kandidatit të së majtës në Dibër, PD ka zgjedhur një peshë të madhe politike siç është Sherefedin Shehu.
