Kërkesa për Kryeministrin: Mbani qëndrim ligjor për rekomandimet e bëra
Kontrolli i Lartë i Shtetit ka kallëzuar në prokurori 159 zyrtarë, të cilët i kanë shkaktuar buxhetit të shtetit një dëm ekonomik prej 85.8 miliardë lekësh. Mes tyre janë 18 drejtues të lartë të administratës shtetërore, të cilët vazhdojnë të qëndrojnë ende në postet e tyre zyrtare. Shifrat janë nxjerrë nga raporti I KLSH I depozituar në Kuvendin e Shqipërisë, në të cilin përfshihen të gjithë kontrollet e zhvilluara në vitin 2015. Listës së penalizimeve të KLSH i shtohen edhe 1.590 punonjës të tjerë të administratës të cilët kanë marrë masa nga vërejtje deri në pushim nga puna.
KLSH-ja raporton në kuvend se janë konstatuar “shkelje të qëllimshme të dispozitave ligjore e nënligjore në fuqi nga ana e një numri të konsiderueshëm nëpunësish dhe ish-nëpunësish të administratës shtetërore të të gjitha niveleve”.
Për periudhën janar—dhjetor 2015, KLSH-ja ka depozituar pranë organit të prokurorisë 51 kallëzime penale për 159 persona, nëpunës dhe ish-nëpunës të administratës shtetërore të të gjitha niveleve. Shumica e kallzimeve janë për veprat penale si “Shpërdorim detyre”, “Shkelje e barazisë në tendera apo ankande publike” dhe “Falsifikime”.
Ndërkohë në raportin e vet për deputetët KLSH konstaton se “në luftën kundër korrupsionit, dy janë problemet kryesore shqetësuese”: mos zbatimi i rekomandimeve të KLSH nga institucionet shtetërore, sidomos për largimet nga detyra të funksionarëve dhe drejtuesve të lartë shtetërorë, si dhe përpjekja e qëllimshme e forcave politike për të etiketuar auditimet e KLSH-së si auditime politike”.
Nisur nga kjo situatë KLSH-ja i ka kërkuar Kryeministrit të marrë masa institucionale, dhe të mbajë një qëndrim të qartë ligjor vecanërisht për 18 drejtues të lartë të administratës shtetërore, të cilët vazhdojnë të qëndrojnë ende postet zyrtare, pavarësisht se sipas KLSH kanë kryer shkelje të rënda.
Nga kontrollet e realizuara gjatë vitit 2015 janë konstatuar shkelje financiare të kryera në periudhën 2013-2015 me një dëm ekonomik në shumën totale prej 125,7 miliard lekë ose e shprehur ndryshe 920 milionë euro.
