Monika Kryemadhi ka bërë një denoncim publik tek Eni Vasili në “Open”, ku ka deklaruar se i kanë kërcënuar vajzën 13-vjeçare.
“Vajzën e vogël, e kam dërguar në shkollë jashtë me konvikt e izoluar, sepse nuk dua që ajo të rrezikojë, sepse duhet të garantoja jetën e vajzës. Unë jam kërcënuar në rrjetet sociale, e jo vetëm”, u shpreh ajo, duke shtuar se edhe pse ka kontaktuar me policinë nuk ka besim në sistemin e drejtësisë në Shqipëri, e po mundohet t’i zgjidhë vetë këto çështje.
Në një kohë kur familja presidenciale ndihet e kërcënuar, pasiguria për popullin e thjeshtë të këtij vendi është më e madhe. Megjithatë, Kryemadhi thotë se Meta nuk do të flasë në publik për kërcënimet pasi i intereson imazhi i institucionit.
“Nëse Meta do të ishte më i vërtetë me publikun do të ishte më i mirë, por për të është më i rëndësishëm imazhi i institucionit sesa loja politike. Jeta e një politikani mund të duket e bukur, por edhe ajo është e vështirë. Do të doja që të isha Zonjë e Parë, e besoj do ta bëja mirë këtë rol, por dua që të qëndroj në LSI deri sa të rinjtë të jenë gati për ta drejtuar”, u shpreh Kryemadhi.
