Nga Olgert Rakipllari
Atë që nuk e bëri dot një lajm i vërtetë i mëngjesit të 24 korrikut 2019, e bëri “Fake News-i” i mbrëmjes së 22 shtatorit 2019.
Sikur të reagonim dhe të dilnim qoftë dhe në mesnatë po njësoj si sot, jo nga një “Fake News” si ky, që na cënon drejtpërdrejtë jetën dhe pronën tonë personale, por nga një lajm i vërtetë, siç ishte ai i mëngjesit të 24 Korrikut, të verës që lamë pas. Në lidhje me ndërhyrjen e policisë, për shkatërrimin e Teatrit Kombëtar.
Të shkatërrimit të pronës sonë të përbashkët, të shkatërrimit të kujtimeve tona, të historisë sonë të përbashkët dhe kjo, jo nga një tërmet natyral, siç u përpoqën të na bindnin dikur, por nga një tërmet artificial, të shkaktuar nga vetë shteti jonë.
Sikur ta kishim dashur pak më shumë pronën publike, pronën tonë të përbashkët, ta mbronim atë pak më shumë, qoftë dhe modestisht. Shumë më pak seç mbrojmë pronën tonë private. Me ne sot sdo të luhej me jetët tona, me pasuritë tona, me të shtrenjtit tanë. Nuk do kishte guxuar askush të luante me ne.
Por ja që nuk na interesoi asnjëherë e përbashkëta jonë, nuk luftuam asnjëherë së bashku për t’i fituar betejat, për atë që na përket të gjithëve.
Dikur ata ishin pak, e ne ishim shumë, sot ata pretendojnë se janë shumë sps ne tashmë jemi ndarë, disa që luftojnë ditë e natë, në mbrojtje të së përbashkëtës, duke sakrifikuar qoftë edhe personalen, e në disa që tremben nga humbja e personales, por shpëtimin sërisht e kërkojnë ta gjejnë tek e përbashkëta jonë, tek ajo që asnjëherë nuk denjuan që ta mbronin.
Sot është nata për të na kuptuar më shumë se kurrë, shumë nga ata që nuk na e kuptuan tronditje e madhe që pësuam, jo nga Fake News-i por nga lajmi i vërtetë i sulmit që policia bëri mbi ne, në mëngjesin e 24 Korrikut, për të na rrëmbyer e shkatërruar të përbashkëtën tonë, ashtu siç sot e nxorri në mesnatë gjithë Tiranën ai lajm i rremë ashtu na nxorri edhe neve në mëngjes ai lajm i vërtetë për sulmin ndaj teatrit.
Ne nuk u trembëm kur shteti na shpërndau fake news-in se gjëma e madhe do ndodhte tek teatri nëse do të kishte tërmet, ne u alarmuam nga njoftimet që na vinin se një ditë do të na sulmonte pikërisht ajo që duhet të na mbronte, policia.
Ligji i karma-s së teatrit veproi mbi ata që dje u përpoqën ta shmangnin apo qëndronin indiferentë, sot ata reagojnë të revolutuar për atë që ju ndodhi.
Sot shteti kërkon dënimin e autorëve të “Fake News-it” për tërmetin, e ne po ashtu kërkojmë dënimin e atyre që na mashtruan se me një tërmet të presupozuar si ai i djeshmi me 5.8 ballë do të na bënte gjëmën tek teatri, sot Teatri qëndron stoik në këmbë madje as një copë pupuliti nuk ka rënë në tokë.
Nëse përgjegjësit e fake news-it të dytë do të dalin përpara drejtësisë, atëherë të gjithë ata arkitektë, specialistë të fushës dhe pushtetarë që guxuan të na thoshin me vetdije një fake news të tillë për teatrin do e kërkojmë të vihen po njësoj përpara drejtësisë. Dëmi i shkaktuar mbi ne është po i njëjti.
Qëllimi i tyre në fund ishte i njëjtë, këta na nxorrën nga shtëpitë nëpërmjet një lajmi të rremë për sa më shumë klikime, që më pas të përkëtheheshin në lekë, e ndërsa shteti pasi nuk na bindi dot me fake news-in e gjëmës nga tërmeti, dërgoi policinë e cila përpoq të na nxirrte me zor nga godina e “pushtuar” për ta shkatërruar teatrin, e ndërtuar kulla që në fund sërisht të fitohej sa më shumë lekë.
