Kandidati për deputet në Partinë Demokratike, në qarkun e Durrësit, Igli Cara e ka cilësuar si vjedhjen e shekullit, projektin e kryeministrit Rama për shndërrimin e portit të Durrësit dhe zonës përreth në marinë.
I ftuar në “Abc-ja e Mëngjesit”, Cara tha se më 25 prill duhet t’i themi jo kësaj babëzie të paparë.
“Rama ka zgjedhur dy qytete të kandidojë, une do flas për Durrësin. Rama me cubat e tij po mundohet të bëjë një fushatë të pazakontë në Durrës. Partia Demokratike do të fitoj në Durrës, pasi qytetarët e kanë të qartë se çfarë kanndodhur në këto 8 vite në qytetin bregdetar”, tha Cara lidhur me fushatën në Durrës.
“Rama prish portin aktual dhe i fal tokën me vlerë 2 miliardë euro një ndërtuesi privat, ndërsa merr edhe 500 milionë euro nga taksat tona për ndërtimin e portit të ri. Kjo është vjedhja e shekullit. Porti i Durrësit është pasuri kombëtare, është pasuri e përbashkët e jona, dhe nuk mund të falet sikur të ishte asgjë, nuk mund të falen 100 hektarë tokë sikur të ishin asgjë. Porti i Durrësit është port me rëndësi të jashtëzakonshme ekonomike për Durrësin dhe për gjithë vendin”, deklaron kandidati i Partisë Demokratike në Durrës.
