Përmes një statusi në Facebook, koordinatori i PD dhe aktori Julian Deda ka treguar përmes ironisë arsyet e kritikave të tij ndaj Bashës dhe Ramës.
Ai tregon se arsyeja se përse ka kritikuar Ramën dhe tashmë Bashën, është se ata e kanë paguar.
I gjithë postimi i Dedës shoqërohet nga nota humori dhe ironie ndërsa fton të gjithë kuriozët se tashmë që zbuluan të vërtetën e madhe të shohin punët e tyre.
“Më pyesnin shpesh: ‘Ore ti, pse kritikon Ramën? Pse shan Rilindjen? Të ka dhënë Luli lekë apo do të bëhesh ministër?’ Kurse tani më pyesin: ‘Po ti ça ke me Lulin? U bëre me Ramën? Të jep Jozi lekë, apo je i futur nga Doktori?’
Pas kaq shumë pyetjesh, pas kaq shumë kohësh, pas kaq shumë dilemash që po e mundojnë njerëzimin, dilema dhe paqartësi të cilat kanë futur në konfuzion kombe dhe shtete të medha e të fuqishme të botës. Por edhe për të shuar kureshtjen e çdo shqiptari, që sakrifikoi duke lënë punet e veta për t’u marrë me zgjidhjen e kësaj enigme, unë kam vendosur të flas. Kam vendosur të tregoj të vërtetën.
Të dashur kuriozër. Unë i bëj të gjitha këto, sepse marr lekë, pa fund lekë. Për të kritikuar Ramën marr 100 mijë euro nga Luli. Ndërsa tani, që e kam me Lulin, jo vetëm që shkoj përdite në Surrel dhe pi kafe me Ramën, por po siguroj jetën time dhe të nipërve e mbesave të mia. Për çdo kritikë marr nga një copë toke në bregdet, kurse për shkrimin e fundit, u mblodhën të gjithë këta kundërshtarët e Lulit, shtinë lekët dhe më blenë një vilë te Samir Mane. Ja kjo është e vërteta. Pse kujtuat se e bëj kot unë? Kujtoni ju se e bëj se më dhimbset Shqipëria? Jo mor vlla, vetëm për lekë.
Tani që e morët vesh dhe besoj se jeni më të qetë, futjuni punëve tuaja, se i keni lënë pak mbas dore. Ju përqafoj të gjithëve dhe faleminderit”, ka shkruar Julian Deda.
