Gjatë vizitës së tij në Lezhë, kryetari i Partisë Demokratike, Lulzim Basha, ka takuar dy familje në nevojë. Të parën takoi familjen e Flora Filipaj, e cila është nënë e 6 fëmijëve ku njëra prej tyre, Florinda, është e sëmurë.
Folra thotë se e vetmja ndihmë që marrin, është pagesa e invaliditetit nga vajza e sëmurë, të cilat nuk dalin as për të paguar dritat dhe ujin, ndërsa burrin e ka të papunë. Ajo gjithashtu thotë se shteti i ka hequr edhe ndihmën ekonomike.
“Ne me thënë të drejtën, me pensionin e kësaj jetojmë! Mbulojmë drita, ujë, burri pa punë! Dy vajza i kam të martuara, tre i kam në shkollë, vetë pa punë duke i shërbyer kësaj. Grupi i parë është invalide, merr 100 mijë kjo, 100 mijë unë. Më kanë hequr ndihmën ekonomike, ka një vit e gjysmë! Burri është pa punë!” tha ajo.
“110 mijë lekë kam paguar dritat, ja ku janë. Janë faturat e dritave. Jam nënë me invalid brenda dhe shiko se çfarë më thotë drejtori i energjisë; shko shiko sahatin thotë, shikoje ku është kjo, sa lexon kilovat. Tani shiko faturat e dritave! Tani a mund ta lë me vdek në ftohje, pa ndezur ngrohjen këtu?! Si mund ta lë?! Ndaj, i bëj thirrje shtetit të vendos dorë në familjet në nevojë!”- u shpreh Flora Filipaj.
Pasi u njoh me vështirësinë që kalon kjo familje, Basha u zotua se pas 25 prillit, të gjitha që i kanë hequr nga ndihma ekonomike me të padrejtë, do t’i rikthehet ndihma ekonomike dhe ndihma ekonomike menjëherë do të dyfishohet. Më tej ai shtoi se energjia elektrike deri në 300 kv për muaj do t’i ulet çmimi, si dhe do të jetë rimbursimin i ilaçeve 100% sipas diagnozës e në veçanti në raste të tilla.
“Me 25 prill do ta ndryshojmë këtë. E para e punës që do të bëjmë; për të gjithë familjet që i kanë hequr nga ndihma ekonomike me të padrejtë, do t’i rikthehet ndihma ekonomike dhe ndihma ekonomike menjëherë do të dyfishohet. E dyta, energjia elektrike deri në 300 kë për muaj do t’i ulet çmimi. E treta, do të jetë rimbursimin i ilaçeve 100% si pas diagnozës e në veçanti në raste të tilla. Ne kemi firmosur një marrëveshje edhe me personat me aftësi të kufizuar për t’i ndihmuar që të administrojnë, në mënyrë që paratë të shkojnë tek njerëzit në nevojë siç është vajza jote. Të bëhemi të gjithë bashkë së pari të ndihmojmë më të pamundurit siç është familja jote dhe asnjë fëmijë po të the, më shiko në sy, asnjë fëmijë i joti, që ka dëshirën për të studiuar nuk ka për të mbetur pa studiuar për shkak se ti s’ke mundësi ekonomike. Ky është zotimi dhe angazhimi i Lulzim Bashës.”– u shpreh Basha.
Takimin tjetër lideri i opozitës e pati në familjen e një çifti të moshuarish, Jak dhe Age Filipi, të cilët thone se pensionet e tyre minimale nuk u dalin për të blerë ilaçet e jo më për të kaluar muajin. Përpos kësaj ata thonë se nuk kanë marrë asnjë lloj ndihme nga shteti gjatë pandemisë.
“Unë e kam 50 të vjetra, pa 300 lekë nuk është bërë 50 akoma, të vjetra. Burri im 58 të vjetra! 108 mijë lekë të vjetra me paguaj dritat, ujin, ilaçet. 50 mijë më bëjnë ilaçet në muaj! S’ngelet as për bukën e gojës, nuk ngelet gjë?! Nuk kemi çfarë të bëjmë! Hajt se kur jemi në një shtëpi, jemi vetë, mirë e boll sa për të jetuar. Po s’kemi as si të jetojmë! Duhet të hamë, duhen ilaçe, duhen, jam e sëmur s’kam arrit as për të shkuar për ta vizituar, se duhen parë. Duhet për të marrë ilaçe. 2 fleta ilaçe, 25 mijë lekë. Ja kam lënë burrit tim pa ja marrë. A duhen të paguhen ujë, drita, nuk jetohet ore ti!” – tha Age Filipi.
Duke iu referuar programit të Partisë Demokratike, Basha u zotua se pas 25 prillit të gjithë pensionistëve do t’u kthehet dinjiteti u munguar për 8 vite. Ai u shpreh se pensionistët nuk kanë për të paguar më para për ilaçe, pasi do të jenë 100% të rimbursueshme, sipas diagnozës dhe ilaçe cilësore.
“Tani ka ardhur koha ta largojmë këtë të keqe. Në 25 Prill të bëhemi të gjithë bashkë. Ne e kemi një plan për t’ju ardhur në ndihmë të gjithë familjeve në nevojë, edhe pensionistëve. Se vendi ka mundësi t’i ndihmojë familjet. Të paktën t’ju sigurojë një dinjitet, se unë s’po them se do ju japim luks. Të paktën të mos keni probleme me dritat, me ujin, me bukën. Të mos ngelet njeri pa u ushqyer, pa pasur ujin e pijshëm, pa pasur drita. Ju nuk keni për të paguar më para për ilaçe, do të jenë 100% të rimbursueshme, e para. E dyta, sipas diagnozës dhe ilaçe cilësore, jo kështu siç i kanë bërë këto. E dyta, familja që të mbetet pa të ardhura për të paguar energjinë, ujin dhe ushqimin bazik nuk do të ketë. Qofshin këto me ndihmë ekonomike, qofshin pensionistë. Kjo është zgjedhja e 25 prillit! Ky është vendimi që do të marrin të gjithë shqiptarët më 25 prill, që nga ty pensioniste, të rinjtë, të rejat. Me 25 prill do të ndahemi nga e keqja e do ecim përpara. Ka shumë mundësi Shqipëria për t’i ndihmuar njerëzit në nevojë. Unë ju garantoj që programi që kemi, këta njerëz që janë garantët e programit, do t’ju vijmë në ndihmë. Familja ka qenë gjithmonë baza e shoqërisë tonë, edhe kur situata ka qenë shumë keq njerëzit janë mbajtur te familja. Është e vështirë nuk është detyrë e lehtë, po do bëhemi bashkë dhe do t’ia dalim.” – u shpreh Lulzim Basha.
