Pas një ngurimi të gjatë, pak minuta më parë dizenjatorët e FSHF-së ka vendosur edhe për arbitrat që do të gjykojnë derbin. Në fakt vonesa në shpalljen e emrave hyn në strategjinë për t’i mbajtur të fshehtë emrat e xhaketave të zeza sa më shumë të jetë e mundur, për të mos i bezdisur, pasi treshja e caktuar është më logjikja. Lorenc Jemini do të jetë kryesor dhe asistentë Ermal Barushi e Denis Rexha, të tre gjyqtarë të FIFA-s. Dhe mendimi i përgjithshëm është se pikërisht këta janë nga arbitrat më të mirë në Shqipëri, kështu që vazhdimisht gjejnë edhe konsensusin e të dy klubeve. Për Jeminin ky është derbi i katërt radhazi, ndërsa për Barushin dhe Rexhën i treti. Edhe shifrat tregojnë se pikërisht këta janë më të pranushmit prej dy klubeve nga më të vështirët në zgjedhje. Ndërkohë që dizenjatorët janë treguar të kujdesshëm edhe në caktimin e arbitrave pas portave, që do të jenë Enea Jorgji dhe Emirion Sino, ndërsa i katërt Doriando Myftari.
