Java Çame/ Promovohen librat e shkrimtarit dhe aktivistit të çështjes çame, Hekuran Halili

0
55
Në ditën e tretë të Javës Çame janë promovuar librat e shkrimtarit dhe aktivistit të çështjes çame, Hekuran Halili.
Të dy librat “Babai” dhe “Mite, legjenda dhe përralla nga Çamëria” tregojnë lashtësinë e krahinës së Çamërisë.
Autori i veprave Hekuran Halili tregoi se në to, lexuesi gjen jo vetëm letërsi, por më shumë historinë e një popullate që vjen nga krahina e Çamërisë dhe ka vlera jo vetëm kulturore dhe patriotike, por ka vlera të shqiptarizmës.
“Ne jemi një popullatë e talentuar, vitale, me histori, me traditë, që spikatim në kulturën kombëtare shqiptare si ai guri xhevahir, si diamanti, në të gjithë kurorën e kuturës kombëtare shqiptare, që është brilante në ballkan edhe më tej.
Historia jonë duhet rishkruar. Libri “Babai” nuk është vetëm historia e babait tim, por është e të gjithë baballarëve në viset skajore, që mbetën jashtë trungut shqiptar në vitin 1913, sepse në themel kanë të njëjtën tragjedi.
Libri ka shumë dimensione e vlera nuk është tjeshtë letërsi”.
Ndësrsa kryetari i Fondacionit Çamëria “Hasan Tahsini”, Alket Veliu u shpreh se në të gjitha botimet që ne kemi promovuar, jo vetëm në javën çame kemi sjellë fakte që ndihmojnë në rishkrimin e historisë së Shqipërisë, në veçanti të historisë së krahinës së Çamërisë.
“Hekurani është simboli i rezistencës çame për shkak se është nga qyteti i Sarandës, duke mbajtur me punën dhe penën e tij, që nga krijimi i shoqatës Çamëria deri tek krijimtaria letrare, gjallë atdhedashurinë dhe historinë e lashtë të Çamërisë”.
Vlerësim të veçantë për botimet e shkrimtarit Hekuran Halili pati edhe Prof. Ksenofon Krisafi, i cili tha se: “Gjykoj që puna e Hekuranit është për t’u vlerësuar maksimalisht, pikërisht sepse ndjejmë që vendi, njerëzit, atdheu, shqiptarët kudo që janë, nga Çamëria në Kosovë, duhet të dinë të vërtetat. Të vërtëtat që një makineri e tërë propagandistike përpiqet t’i fshehë, t’i shtrembërojë, dhe t’i bëjë si të vërteta falsifikimet.
Rishkrimi i historisë është temë e preferuar nga analistët, politikanët dhe historia shkruhet mbi bazën e dokumentave dhe doemos lind nevoja që të rishkruhet historia dhe ajo nuk është baraz me mohimin e saj, as me deformimin, as me përmbysjen e të vërtetave”.
Për 2 veprat e autorit Hekuran Halili folën edhe prof. Resmi Osmani dhe Tanush Çaushi, si dhe aktivistë të tjerë, të cilët bënë një resume të vlerave artistike dhe historike që percjellin librat për letërsinë shqipe dhe rëndësinë që kanë këto vepra për brezin e ri.