Banorët e Himarës janë shprehur të revoltuar me qeverinë e cila sipas tyre po iu prish shtëpitë dhe po u rrëmben pronat, ndërsa ngrejnë dyshime për qëllimet e vërteta të aksionit i cili vijon prej dy ditësh.
Mes banorëve të prekur nga projekti i Bashkisë së Himarës për zgjatimin e lulishtes përgjatë bregdetit ka edhe nga ata që identifikohen si miq të kryeministrit Edi Rama, por kjo nuk e ka shpëtuar pronën e tyre.
“Ne himarjotët jemi autoktonë dhe jemi në këtë tokë më të vjetër se dielli që shikoni. Ne nuk do na gjunjëzon as Rama, unë jam mik personal i Ramës, por asnjë s’do ta gjunjëzojë dot revolucionin e Himarës”, theksoi banori.
Aksioni i IKMT i cili ka nisur ditën e djeshme për prishjen e objekteve, ka vijuar sot në ditën e dytë. Janë rreth 80 objekte banimi dhe biznese të cilat do shemben për t’i hapur rrugë projektit të rikualifikimit të shëtitores së qytezës bregdetare.
/shqiptarja.com/
