A e ka ndihmuar Dritan Zagani Emiljano Nuhun të fitojë azil në një nga vendet e BE-së?
Kjo ka qenë teza e hedhur së fundi nga gazetari Artan Hoxha, teksa kishte publikuar dhe për herë të parë foton e oficerit Nuhu dhe vajzës së tij vetëm tre vjeçare.
Për shumë gazetarë që e njohin mirë si funksionon policia e shtetit dhe roli që ka pasur në disa aksione të rëndësishme Nuhu, publikimi i kësaj fotoje përbën rrezik të madh për të, për shkak se ka arrestuar persona të lidhur ngushtë me krimin.
Ndërkohë në një përgjigje të gjatë për Hoxhën, ish-oficeri Dritan Zagani, shkruan që publikimi i asaj fotoje ka shërbyer për t’iu çuar lajm kriminelëve që Nuhu i ka arrestuar në një operacion në Qafë Kashar rreth tre vjet më parë.
Ai sqaron se nuk ka asnjë mundësi që të ndihmonte Nuhun për të fituar azil, pasi ai nuk ka asgjë në dorë dhe largimi nga Shqipëria e zhveshi nga çdo mundësi a për të ushtruar profesionin e tij si agjent antidroge në radhët e policisë.
Zagani thotë se e ka ndihmuar Nuhun me të vetmin qëllim për të ndihmuar një polic të trembur deri në palcë dhe të braktisur nga shteti dhe nga institucionet. Ndihma nuk ka qenë asgjë më shumë se një ndihmë njerëzore.
“U akuzova se e kam ndihmuar unë të fitoje azilin… sa qesharake… kush jam dhe çfarë kam në dorë une… asgjë… asgjë, se këtu nuk ka Saje ministër që ta kem mik dhe unë, asgjë se këtu funksionon vetëm ligji dhe e drejta për këdo qënie njerëzore, pa dallim race partie apo të forti…, por po o njeri… e ndihmova Emilianin si shqiptar bashkëvuajtës… si polic që ishte tremb’ deri në palcë nga krimi me pushtet dhe ishte zhgënjyer fort shum nga shteti që ai filloi shum i ri t’i shërbente… e ndihmova me aq sa kisha edhe pse kam vetëm 10 ditë që e njoh…
E ndihmova me një pjatë supë për femijen e drobitur nga udhëtimi raskapitës me autobus për gjithë natën dhe i ndihmova të mbaja një valixhe me roba, se ai kishte fëmijën në krahë… e ndihmova, ashtu si do ta bëja e do ta bëj sa të jem gjallë për këdo shqiptar… dhe me një kënaqësi të veçantë për një polic hallexhi që ia di dhe vlerësoj dhimbjen në luftën për mbijetesë… e ndihmova edhe për ta qetësuar pak familjen që s’dinin nga të iknin e çfarë të bënin…, pra po e ndihmova ashtu si do ta kisha bërë dhe për ty… për atë dhe ata që kanë nevojë në një hall që unë e di më mirë se askush çfarë është ai hall kur të zë…
Pra, Artan po qe se më pyete për këtë ndihmë… po e ndihmova dhe jam i lumtur që e bëra… dhe nëse ti kaq e quan militantizëm, atëherë po… jam militant që u zhgënjeva nga ti me atë që bëre publikisht më shumë se një herë për ta denigruar atë polic dhe për të luajt’ me dy porta me pushtetin i nderuar dhe po luan me dy porta bën autogol o njeri… dhe harroje jo ti…, por kushdo të më lidhë mua dhe atë çfarë unë bej me politikën… unë jam do jem dhe do vdes polic…!”, shkruan mes të tjera Zagani.
