Ish-ministri socialist i Financave, Arben Malaj ka ngritur shqetësimin mbi borxhet e papaguara në 2018 të sigurimeve shoqërore, që arrijnë në vlerën e 14 miliardë lekë ose 110 milionë euro.
Përmes një postimi në rrjetet sociale Malaj shkruan se duhet transparencë, pasi heshtja i bën këto institucione përgjegjëse për situatën.
“Disa institucione nuk kanë derdhur as pjesën e sigurimeve shoqërore që ju kanë mbajtur nga paga e tyre. Kjo mund të konsiderohet “vjedhje” e parave të tyre deri atëherë kur këto shuma vërtetohet se janë derdhur në sigurimet shoqërore”, shkruan Malaj në Fecbook.
Postimi nga Arben Malaj:
Shteti (nuk) ka rënë. Në media është deklaruar se, në fund të vitit 2018 borxhet e pa-paguara të sigurimeve shoqërore arriten në 14 miliardë lekë ose 110 milionë euro.
Një pjesë e konsiderueshme e tij i përket pushtetit vendor. Mospagesat vazhdojnë të përkeqësohen në rreth 1100 institucione. Qartësimi i kësaj situate, transparenca maksimale me punonjësit e sektorit publik që nuk u paguhen sigurimet shoqërore, prezantimi i një plani konkret se si dhe deri kur do të shlyhen këto detyrime, qartëson nqs shteti nuk ka rënë.
Kjo është një çështje sociale shumë kritike për të gjithë punonjësit. Disa institucione nuk kanë derdhur as pjesën e sigurimeve shoqërore që ju kanë mbajtur nga paga e tyre. Kjo mund të konsiderohet “vjedhje” e parave të tyre deri atëherë kur këto shuma vërtetohet se janë derdhur në sigurimet shoqërore. Njëkohësishtë mos-pagesat fshehin deficitin buxhetore dhe borxhin publik të një vendi, kjo prodhon pa qartësi dhe pasiguri për të ardhmen.
Mospagesat cënojnë rëndë kredibilitetin e qeverisjes. Në një vend të qeverisur me përgjegjësi morale dhe ligjore sapo këto shifra të bëheshin publike, qeveria, dhe bashkitë duhet të bënin sqarim publik për saktësinë e shifrave dhe planin konkrete të shlyerjes së tyre.
Heshtja i bënë përgjegjës edhe ligjore. Disa hapa të menjëhershme duhen të ndërmerren pa vonesë :
(1) Interpelancë parlamentare me kryeministrin.
(2) Verifikim i shifrave nga KLSH.
(3) Identifikimi i drejtuesve të institucioneve që kanë shkelur ligjin duke mos paguar në të njëjtën kohë pagat dhe sigurimet shoqërore dhe penalizimi për shpërdorim detyre;
(4) identifikimi i përgjegjësisë për punonjësit thesarit që kanë lejuar pagimin e pagave pa paguar në të njëjtën kohë sigurimet shoqërore;
(5) bllokimi i menjëhershëm i çdo shpenzimi operative dhe i investimeve për zyra, makina, pajisje, shërbime brenda dhe jashtë vendit deri në shlyerjen e detyrimeve të prapambetura;
(6) Bllokimi i çdo shpenzimi për udhëtime e dieta për aktivitete ndërkombëtare duke e deleguar përfaqësimin në nivel ambasadori.
(7) Detyrimi i institucioneve përgjegjëse që brenda 15 ditëve të paraqesin programin e shkurtimit të shpenzimeve operative dhe afati i shlyerjes së detyrimeve të prapambetura për sigurimet shoqërore.
(8) Një analizë e thelluar për eleminimin e fryrjes së numrit të punonjësve për motive politike e nepotiste në institucionet që nuk kanë paguar sigurimet shoqërore;
(9) Qartësimi publik nga qeveria i hapave konkrete ligjore dhe administrative të ndërprerjes së mos pagimit në të njëjtën kohë të pagave dhe sigurimeve shoqërore dhe të shlyerjes së detyrimeve të prapambetuar brenda afateve konkrete.
Pensionistët e sotëm dhe ata të viteve të ardhshme si edhe taksapaguesit shqiptarë nuk duhen rënduar me kostot e rënda të mos pagimit të sigurimeve shoqërore.
Pensionistët penalizohen nga mos rritja reale e pensioneve, taksapaguesit do të rëndohen nga rritja e taksave për të mbyllur gropën e madhe dhe në rritje të deficitit të skemave sociale, deficitit buxhetore dhe rritjen në nivele kritike të borxhit publik zyrtar dhe të fshehur.
