Gazetarja Rudina Xhunga, e ftuar në rubrikën “Opinion” në “News 24” deklaroi se 2021 duhej të ishte viti që të mundim virusin dhe jo njëri-tjetrin. Xhunga u shpreh se viti 2021 duket i papërshtatshëm për zgjedhje.
“Situata politike është e mbarsur me provokimin e maxhorancës, e cila tashmë e ka kuptuar si reagon Presidenti i Republikës. E kemi parë se presidenti ka reaguar më shumë, më pas zonja Kryemadhi, dhe i fundit zoti Basha, që ka pasur reagime më të përmbajtura. Opozita besoj se duhet të ishte mësuar me lojën. Po ashtu, opozita duhet të kuptojë, që roli i viktimës nuk i bën përshtypje askujt. Gjithsesi ata bëjnë mirë të gjejnë gjuhën, sepse na pret një vit i vështirë dhe pavarësisht rëndësisë së zgjedhjeve, nuk janë zgjedhjet e tyre më të rëndësishme, por zgjedhjet tona, për një vit të pazakontë dhe për një kohë, që nuk dimë çfarë do sjellë.
Viti që vjen është viti më i keq për zgjedhjet. Viti tjetër duhet të ishte viti i armëpushimit kombëtar. Do të duhej që të gjithë të kishim kohën e duhur për të mundur virusin, jo për të mundur njëri-tjetrin në 2021”.
Rudina Xhunga kulmin e karierës së saj profesionale e ka arritur si zëvendëskryeredaktore e “Zërit të Popullit”, ish-gazeta e Partisë Komuniste dhe më pas e Partisë Socialiste.
