Ish-deputeti i PD Bardh Spahia i arrestuar, është dërguar në Gjykatën e Shkodrës për të marrë masën e sigurisë. Bardh Spahia u arrestua dy netë më parë nga policia, ndërsa ishte duke shkuar në një debat televiziv. Ai ishte shpallur person në kërkim nga policia, pas revoltës që shpërtheu përpara KZAZ-së së Shkodrës.
Ish-deputetë të opozitës dhe protestues të tjerë janë mbledhur para gjykatës dhe e kanë pritur me duartrokitje mjekun, politikanin, bashkëqytetarin e tyre. Dhjetra policë e kanë rrethuar godinën, thua se po gjykohet ndonjë terrorist.
Të akuzuarit përballen me gjykatën, pasi qeveria i akuzon për “Shkatërrim të pronës me zjarr”, ”Dëmtim me dashje të materialeve zgjedhore”, “Kundërshtim të Punonjësit të Rendit publik”, “Goditje për shkak të detyrës”, “Kanosje për shkak të detyrës” dhe “Mosbindja ndaj urdhrit të Punonjësit të Rendit publik”.
Përveç Bardh Spahisë, të arrestuarit e tjerë që do të dalin para gjykatës janë: Gentian Bytyqi – polic i bashkisë Shkodër, Alfred Nikolli- polic i bashkisë Shkodër, Adi Garuci – specialist i bujqësisë, Bashkia Shkodër, Aleks Ndoj – polic i bashkisë dhe Orlando Thepi.
