Mbledhja e Komisionit Hetimor për inceneratorët në Kryesinë e Kuvendit ishte planifiuar ditën e sotme në orën 12.30.
PD bën me dije se mbledhja është bojkotuar nga deputetët e PS. Selia blu akuzon se bojkoti i deputetëve vjen një javë pas arrestimit të ish-ministrit të Mjedisit Lefter Koka.
“Hetimi i Komisionit për incineratorët u bllokua sot nga Partia Socialiste. Deputetët e saj nuk morën pjesë sot në mbledhjen e lajmëruar më herët nga kryetarja e Komisionit Hetimor, Jorida Tabaku. Mospjesëmarrja e deputetëve socialistë ndikon në mosarritjen e kuorumit për shumicën, duke bllokuar kështu hetimin për inceneratorët. Mbledhja e Komisionit Hetimor të inceneratorëve u bllokua nga PS një javë pas arrestimit nga SPAK të ish ministrit të Mjedisit Lefter Koka. Partia Demokratike dërgoi në SPAK padinë penale për inceneratorët në tetor 2020. Kryeministri Edi Rama është në krye të listës së të kallëzuarve, por deri tani ndaj tij, ministrave të tjerë dhe kryebashkiakëve socialistë nuk është bërë asnjë veprim nga SPAK”, thotë PD.
