Hetimin dhe për familjarët, bashkëshorten, fëmijët, si dhe personat e afërt të Alfred Pezës
Inspektorati i Lartë i Deklarimit dhe Kontrollit të Pasurive dhe Konfliktit të Interesave (ILDKPKI), ka filluar kontrollin e plotë dhe hetimin e pasurisë së ish-gazetarit dhe deputetit Alfred Peza.
ILDKPKI bën me dije se nisur nga njoftimet e mediave në lidhje me blerjen e aksioneve në një bankë nga bashkëshortja e deputetit, me vlerë rreth 1,13 miliardë lekë, Inspektori i Përgjithshëm ka urdhëruar fillimin e procedurave të kontrollit të plotë dhe hetimit administrativ në bazë të ligjit ” Për parandalimin e konfliktit të interesave në ushtrimin e funksioneve publike”, për të gjitha deklaratat e interesave private që prej vitit 2003 të Alfred Pezës.
Objekt i këtij kontrolli nuk do të jenë vetëm pasuritë e subjektit në fjalë, burimet e krijimit dhe ligjshmëria e tyre, por gjithashtu edhe gjendja e konfliktit të interesit. Mbledhja e të dhënave dhe informacioneve, kryerja e veprimeve verifikuese dhe hetimit administrativ do të shtrihet edhe për familjarët, bashkëshorten e tij, fëmijët, si dhe personat e lidhur.
