Sot pasdite, kryetari i Partisë Drejtësi, Integrim dhe Unitet, Shpëtim Idrizi është takuar me ambasadorin e SHBA, Donald Lu dhe ambasadoren e BE, Romana Vllahutin.
Ky takim u përqendrua tek Reforma në Drejtësi.
Diplomatët informuan nënkrytarin e Kuvendit, Idrizi për zhvillimet e fundit për reformën në drejtësi dhe propozimim e zëvendës sekretares së Shtetit, Victoria Nuland. nga ana e tij kryetari i PDIU-së theksoi që 90 përqind e shqiptarëve janë shprehur për rëndësinë dhe domosdoshmërinë e kësaj reforme, ndaj ai ngulmoi në qëndrimin e PDIU-së në favor të kësaj reforme dhe mbështetjen për variantin e ri të kompromisit të dhënë së fundi nga partnerët tanë.
Madje, PDIU i bën thirrje të gjitha partive parlamentare dhe deputetëve të Kuvendit të Shqipërisë ta miratojnë dhe këtë nen të fundit duke e konsideruar një mundësi të qartë kompromisi propozimin e zëvendës sekretares së Shtetit për nenin 88.
Nëse sërish nuk arrihet në një kompromis Shpëtim Idrizi thotë që votojmë reformën dhe nenin 88 e çojmë në referendum, ku vendos populli.
Po kështu, PDIU insiston që dhe pas miratimit të kësaj reforme të shkohet drejt referendumit si shprehje direkte e demokracisë. Në këtë takim Idrizi ka shprehur kontestimin e fortë të PDIU-së për ndryshimin Kushtetutës mbi orientimin seksual. Sipas tij, neni 18, i cili i hap udhë martesave homoseksuale nuk është pjesë e reformës në drejtësi, por megjithë qëndrimin kundër të PDIU, këtu ka nevojë për një debat më të gjerë publik.
Idrizi theksoi se pjesë e këtyre ndryshimeve kushtetuese duhet të jenë edhe propozimet e janarit të bëra nga PDIU, veçanërisht e zgjedhjes së Presidentit nga populli dhe kalimi i akteve kushtetuese me referendum po nga populli, për t’i rikthyer sovranit të drejtën e vendimarrjes.
