Nga Julian Hoxhaj
Nga qyteti i Elbasanit, ku ishte i pranishëm në një takim me strukturat e PDIU, kryetari i kësaj force politike Shpëtim Idrizi, u shpreh se ngritja e Komisionit Hetimor për Çështjen shqiptare të Çamërisë, nuk ka për qëllim të hetojë Greqinë. Nga ana tjetër kreu i PDIU tha se Çështja shqiptare e Çamërisë nuk është monedhë për t’u shkëmbyer, por as nuk mund të mbahet peng nga askush.
“Po shfrytëzoj rastin t’i bëj thirrje gjithë forcave politike dhe gjithë qytetarëve shqiptarë, t’u them që është në nderin e Kuvendit shqiptar që pleq, dëshmitarë okularë të kësaj masakre, të cilët kanë dëshmuar në televizione apo vende të ndryshme, apo dhe në dosjen e PDIU-së, për herë të parë të kenë mundësi që dëshmitë e tyre të jepen para Parlamentit të Shqipërisë dhe të mbeten në rekordet dhe analet e Parlamentit të Shqipërisë. Ashtu siç dua të sigurojë të gjithë ata që kanë merak se mos investigojmë Greqinë, që të mos kenë asnjë lloj meraku për këtë, sepse edhe një herë e kam thënë se Çështja shqiptare e Çamërisë nuk është as monedhë për ta shkëmbyer dhe as nuk mund të mbahet peng nga ndokush”, tha ndër të tjera Shpëtim Idrizi, duke folur për mediat vendore.
Më tej, Shpëtim Idrizi u shpreh se Kuvendi ka kohën e nevojshme për të zhvilluar këtë veprimtari.
“Dje patëm një diskutim në konferencën e kryetarëve, është një kërkesë e Partisë për Drejtësi Integrim dhe Unitet, e cila konsiston në faktin e ngritjes së një komisioni hetimor. Faktikisht, Parlamenti ka të gjithë kohën e nevojshme, mbi tre muaj po të doni, që ta zhvillojë këtë veprimtari. Idea jonë është, që të kemi mundësi, që nëpërmjet këtij komisioni hetimor të mbledhim të gjitha faktet, provat, dëshmitë, për masakrën e shqiptarëve të Çamërisë.”
I shoqëruar nga deputeti Aqif Rakipi, kreu i PDIU-së vlerësoi maksimalisht strukturat e PDIU në Elbasan. Synimi i PDIU për zgjedhjet e ardhshme në këtë qytet dhe gjithë Shqipërinë, është dyfishimi i numrit të deputetëve në Kuvend.
Nënkryetari i Kuvendit tha se partia që ai drejton nuk ka qenë dhe nuk ka rendur pas pushtetit, por ka ruajtur të forta kauzat e saj, kauza për gjithë shqiptarët. Edhe deputeti Aqif Rakipi u shpreh gjithashtu që PDIU nuk kërkon mbështetje thjesht për të nxjerrë deputet, por kërkon mbështetje për të qenë faktor në zgjedhje, që problemet që janë sot të mos jenë nesër.
https://www.facebook.com/pdiu.al/videos/1389633314409727/
