“Kryeministri dështoi të mbajë premtimet që dha katër vite më parë para shiptarëve dhe me sulmet ndaj aleatëve, kërkon të mbulojë dështimet e tij.”
Kështu ka deklaruar kreu i PDIU Shpëtim Idrizi në emisionin Opinion ku theksoi se shteti shqiptar nuk është tespi.
Idriziu u shpreh se refuzon retorikën e Ramës që është reduktuar në tepsi e kusia në një kohë kur vendi ka nevojë për politika e programe që të përmirësojnë jetën e njerëzve.
Në lidhje me koalicionin Idrizi theksoi se PDIU është në korsinë e saj, por sipas tij shqiptarët janë ata që zgjedhin.
“Ne do të jemi në koalicion me partinë që do të dalë forcë e parë, me partinë që shqiptarët do të zgjedhin”, tha ai.
Kreu i Partisë Drejtësi, Integrim dhe Unitet i pyetur se sa deputetë do të marrë në zgjedhjet e 25 qershorit shprehu bindjen e palëkundur gjatë gjithë fushatës se PDIU do të jetë grup Parlamentar dhe do ketë më shumë deputetë se sot.
Idrizi në sinkron me idetë që kjo forcë ka propozuar në programin e saj vuri theksin tek problemet e vërteta që Shqipria ka.
“53 % e shqiptarëve duan ta braktisin këtë vend dhe ky vend po shpopullohet. Shqiptarët po ikin e kjo duhet të ndryshojë, sado që të jetë çmimi duhet të ndryshojë. Një tjetër problem kryesor është edhe kanabizimi i vendit. Ne kemi detyrimin të bëjmë reforma, por së pari politika të shohë deformimin e saj, e pastaj të ketë mundësi të bëjë reforma për shqiptarët”, deklaroi Idrizi.
