Renato Hysni Milloshi dhe Jani Aliaj janë shpallur në kërkim nga policia e Tiranës si autorë të krimit të ndodhur më 1 maj në Tiranë
Policia e Tiranës ka zbuluar dhe shpallur në kërkim autorët e vrasjes së Elton Çiços mbrëmjen e 1 majit në lokal “De Niro” në Tiranë. Policia njofton se dy autorët e dyshuar janë Jani Alia dhe Renato Milloshi, të dy persona me precedent të mëparshëm kriminalë për vepra të rënda penale.
Në një konferencë të posaçme për mediat, Drejtori i Policisë së Tiranës Ervin Hodaj i shoqëruar nga nëndrejtori Ermal Muça, tha se për të dy këta shtetas Gjykata e rrethit gjyqësor Tiranë ka vendosur masën e sigurisë “arrest me burg”. “Kemi një sërë provash që dokumentojnë veprimtarinë e tyre kriminale. Për rolin e tyre nuk mund të flasim në këtë moment të parë, pasi çështja është në hetim. Policia e ka motivin, pra e ka zbuluar motivin e saj, por unë e kam të pamundur të bëj deklarata që kanë lidhje me hetimin”.
Hodaj bëri me dije se për këtë ngjarje aktualisht janë arrestuar dhe dy persona të tjerë për veprime që pengojnë zbulimin e të vërtetës. Policia apelon qytetarët të ndihmojnë me informacione për vendodhjen e dy të dyshuarve për vrasjen e Çiços, duke ofruar 500 mijë lekë për çdo informacion të vlefshëm.
