Gjatë pjesës së dytë të ndeshjes ndaj Skënderbeut, trajneri i Partizanit, Agostineli është dëgjuar më shumë se një herë duke i bërtitur nga pankina mesfushorit Felipe Gomez: “Bëj atë që di, për çfarë friksohesh”? Në fakt dikush me mendje më të kthjellët duhej t’i drejtohej atij vetë me të njëjtat fjalë. Pasi u kthye nga dhomat e zhveshjes Partizani lëshoi shumë terren dhe megjithëse dukej se po e administronte rezultatin, topi gjithnjë e më shumë po sillej afër portës së Alban Hoxhës. Pasi humbi 11 metërshin thërriti në pankinë sulmuesin e vetëm Raçiç, me idenë që ka shpenzuar shumë energji dhe nuk i duhej më. Por, që nga ai moment skuadra vendase humbi një futbollist që ishte present në zonën e tij në momentet e goditjeve standarte të korçarëve, por edhe një pikë referimi në rast të ndonjë kondërsulmi. Kur pësoi golin e barazimit dërgoi në fushë Bardhin, një futbollist 18 vjeçar, pa eksperiencë në përballje të këtij niveli, ndërsa në shtesë, ish-trajneri I Napolit u hutua fare, duke e bërë ndërrimin e fundit në të 95’. Fili ishte lojtari që përzgjodhi për aksionin e fundit, por një i tillë nuk erdhi kurrë, pasi Jorgji vërshëlleu tri herë, duke i dërguar futbollistët në dushe, përveç Filit që nuk kishte nevojë, mjafton të ndërrohej.
