Viktima e 4-t nga Koronavirusi në Shqipëri është një 43-vjeçar nga Kavaja. Sipas Ministrisë së Shëndetësisë 43-vjeçari përveç obezitetit nuk kishte probleme të tjera shëndetësore, por mbrëmjen e djeshme është vendosur në frymëmarrje të drejtuar ndërkohë që mëngjesin e sotëm ka humbur betejën për jetën.
Mësohet se 43-vjeçari ka takuar shumë pak persona gjatë qëndrimit të tij në Kavajë.Viktima nga Kavaja ishte kthyer nga Italia përpara 15 ditësh. Ai udhëtonte shpesh në vendin fqinj. Raportohet se 43-vjeçari kishte në pronësi dhe një hotel i cili funksionon gjatë verës.
Specialistët e shëndetësisë kanë nisur gjurmimin për personat e kontaktit të cilët kanë arritur të gjejnë një pjesë të mirë të tyre. Gjithashtu kanë marrë kampionët nga këta persona të cilët i janë nënshtruar testit dhe fatmirësisht rezultatet e para kanë rezultuar negative. Gjithsesi ata duhet të qëndrojnë të vetkarantinuar për 14 ditë në banesat e tyre. Do të jetë testi i dytë që do të tregojë në mënyrë të sigurt nëse këta persona kontakti të 43-vjeçarit janë infektuar nga koronavirusi apo jo. /abcnews
