Kryeministri i Kosovës, Avdullah Hoti, për nder të festës së 28 nëntorit, shpalljes së pavarësisë së Shqipërisë, bëri homazhe te heroi kombëtar, Gjergj Kastrioti- Skënderbeu dhe te shtatorja e Presidentit historik, në Prishtinë para shtatores së ish-presidentit të Kosovës, Ibrahim Rugova si dhe në Prekaz, te Kompleksi Memorial i familjes Jashari.
Kryeministri Hoti tha se 28 nëntori është ditë feste për çdo shqiptar. Ndër të tjera Hoti është shprehur se tragjedia e familjes Jashari është ndër ngjarjet me të rëndësishme në historinë e shqiptarëve.
“Jemi në vendin më të shenjtë te familja Jashari dhe në ditëlindjen e komandantit Adem Jashari, që me sakrificën e familjes së tij, besoj se renditet në listën e ngjarjeve me të rëndësishme historike të popullit shqiptar për liri dhe pavarësi”, deklaroi kryeministri Hoti.
“Bashkë me zëvendës kryeministrat, Driton Selmanaj dhe Besnik Tahiri, kemi nisur ditën sot duke bërë homazhe te heroi kombëtar, Gjergj Kastrioti- Skënderbeu dhe te shtatorja e Presidentit historik, Ibrahim Rugova. Sot është ditë feste për çdo shqiptar, është festë kombëtare. Nderimet tona i filluam nga shtatorja e Skënderbeut me të cilin sigurisht identifikohet Nëntori i Parë, festa më e madhe e të gjithë shqiptarëve”, shkruan Hoti në Facebook.
