Lidhja e Historianëve të Kosovës “Ali Hadri” në Deçan, ka kërkuar dorëheqjen e kryetares së Gjykatës Kushtetuese të Kosovës, Gresa Caka-Nimani, pas vendimit të dhënies së pronave Manastirit të Deçanit duke krijuar precedentë të rrezikshëm në historinë e vendit.
Sipas informacioneve në letër, shkruhet se në 20 maj 2022 bëhen 6 vjet që kur kjo Gjykatë me një grup të gjykatësve vendorë, duke përjashtuar Bekim Sejdiun që ishte kundra dhe të tjerët që kanë abstenuar në votim, ka marrë vendim me anë të të cilit i njeh vendime legjitime dhe ligjore në Kosovën shtet i pavarur dhe sovran, ligjet, vendimet dhe aktet nënligjore që ka marrë Serbia për Kosovën gjatë kohës 1990-1999.
Gresa Caka-Nimani e cila është kryetarja aktuale e Gjykatës Kushtetueses bashkë me ish-gjykatësen Kushtetuese Arta Rama-Hajrizi, kanë qenë pro dhe bashkë me gjykatësit ndërkombëtarë të Kushtetueses pro kërkesës së Manastirit të Deçanit, që pronat dhe ndërmarrjet “Apiko” dhe “Iliria” t’i dhurohen manastirit, në mbështetje të vendimeve të kohës së masave të dhunshme dhe represive të Millosheviçit, deklarojnë historianët.
Ata shtojnë se Gresa Caka-Nimani dhe Arta Rama-Hajrizi, me mbështetjen dhe votimin pro zbatimit të vendimeve të kohës së Sllobodan Millosheviçit në Kosovë, kanë shkelur Kushtetutën dhe rendin e ri kushtetuese në Kosovën e pasluftës.
“Gresa Caka-Nimani, duhet të jep dorëheqje nga detyra e saj në krye të Gjykatës Kushtetuese të Kosovës, ngase akt gjykimi i kësaj gjykate për pronat në Deçan është precedent i rrezikshëm, dhe Kosovën e ka futur në një rrogë qorre, nga e cili e ka të vështirë të dalë. Gresa Caka-Nimani dhe Arta Rama-Hajrizi, me rastin e marrjes së këtij aktgjykimi para 6 vjetësh, kanë dëshmuar se për to më e rëndësishme është karrigia dhe profesioni i tyre se sa interesi i popullit dhe kombit shqiptar dhe mbrojtja e kushtetutshmërisë në Kosovë”, thuhet në letër.
Historianët e Deçanit thonë se dorëheqja e Gresa Caka-Nimanit është rruga më e mirë për dhe do t’i bënte nder që të mos të jetë në krye të Gjykatës Kushtetuese si dhe i kërkojnë të japë llogari se pse i ka dhënë mbështetje kësaj marrëzie me ligjet e Millosheviçit.
Ata bëjnë thirrje që të mos zbatohet aktgjykimi antikushtetues dhe antiligjor për pronat dhe ndërmarrjet “Apiko” dhe “Iliria”.
“Ne, me gjitha forcat tona, do të kundërshtojmë çdo tentim të zbatimit të vendimit tuaj, ngase në Kosovë nuk mund të zbatohen vendimet e Millosheviqit, vendime këto që i ka luftuar e mbarë bota demokratike, dhe të cilat i ka shpallur null misioni i UNMIK-ut në Kosovë”, mbyllet letra.
Ndërkohë kryeministri Albin Kurti në shkurt ka përsëritur qendrimin e tij se vendimi i Kushtetueses për t’i detyruar autoritetet lokale të Deçanit t’ia kthejnë Manastirit të Deçanit 24 hektarë tokë dhe pyje, është i bazuar në “politikën diskriminuese” të qeverisë së Serbisë, të vitit 1997.
Ai deklaroi se do të përpiqet t’i ruajë të drejtat legjitime të Manastirit të Deçanit, por shtoi se edhe drejtuesit fetarë duhet të kërkojnë zgjidhje përmes dialogut dhe marrëveshjes me popullatën vendase në Deçan.
Autoritetet vendase në Deçan besojnë se 24 hektarët tokë dhe pyje janë të ndërmarrjeve shoqërore “Apiko” dhe “Iliria” dhe refuzojnë zbatimin e vendimit të Kushtetueses.
Gjykata Kushtetuese pati deklaruar se vendimi i saj nuk ishte zbatuar dhe i bëri thirrje Prokurorisë së Shtetit të Kosovës që të ndërmarrë veprime të mëtejme, në përputhje me kompetencat ligjore.
Në vendimin për moszbatimin e aktgjykimit, Gjykata Kushtetuese tha se nuk ka juridiksion të vlerësojë përgjegjësinë për moszbatimin e vendimit nga organet përgjegjëse dhe se një vlerësim i tillë i takon prokurorit të shtetit në përputhje me Kodin Penal dhe Kodin e Procedurës Penale.
