Pavarësisht bllokimit të opozitës shqiptare të ngritjes së institucioneve të Vetingut, Inspektoriati i Lartë i Deklarimit dhe Kontrollit të Pasurive dhe Drejtoria për Sigurimin e Informacionit të Klasifikuar po punojnë me intensitet për përmbushjen e detyrimeve të parashikuara në ligjin për rivlerësimin kalimtar të gjyqtarëve dhe prokurorëve.
Shqiptarja.com ka mësuar se ILDKP, aktualisht, po vijon me skanimin dhe kontrollin paraprak të deklaratave të pasurisë së krerëve të drejtësisë, edhe për llogari të Operacionit Ndërkombëtar të Monitorimit. Ekipi i vëzhguesve afatgjatë i ONM, i përbërë i përbërë nga prokurorë dhe gjyqtarë nga Shtetet e Bashkuara të Amerikës dhe Bashkimit Evropian, do të marrin në dorë dosjet e pasurive të njerëzve më të lartë të drejtësisë. Konkretisht, ILDKP ka kaluar në skaner deklaratën e plotë të pasurisë së Prokurorit të Përgjithshëm, Adriatik Llalla, i cili bëri një betejë epike për të sekuestruar serverin me deklarata e pasurive. Po ashtu, referuar përparësisë së parashikuar në ligjin e Veting-ut, në ILDKP po kalon në formë elektronike deklaratat e pasurisë dhe dokumentacionin shoqërues të anëtarëve të Gjykatës Kushtetuese dhe të Gjykatës së Lartë. Sipas burimeve, një kopje e dosjeve të pasurive të funksionarëve në fjalë të drejtësisë do t’i kalojnë Bordit të Menaxhimit të Operacionit Ndërkombëtar të Monitorimit.
Nga ana e tij, Bordi i ONM, do të vërë dosjet në dispozicion të ekipit të vëzhguesve, të cilët do të zbarkojnë në Tiranë në ditët e para të muajit mars, që përkon me përfundimin e verifikimit të kandidatëve për anëtar të organeve të Veting-ut nga vëzhguesit afatshkurtër të ONM. Hetuesit e huaj do të kenë akses të pakufizuar në dosjet e njerëzve të drejtësisë, do të marrin çdo dokument të nevojshëm nga institucionet e huaja dhe ato ndërkombëtare, do të hetojnë si dhe do të propozojnë, rast pas rasti, largimin e gjyqtarëve dhe prokurorëve nga sistemi, në bazë të gjetjeve. Ata kërkojnë informacione, konsultojnë, kopjojnë dhe hetojnë deklarimet e pasurive të paraqitura të prokurorëve dhe gjyqtarëve ose personat e lidhur me të, si dhe çdo dokumentet shoqërues.
Hetuesit e huaj kanë të drejtë të kërkojë që Komisioni ose Kolegji i Apelimit të marrë në shqyrtim prova ose të paraqesë prova të marra nga organet shtetërore, entitetet e huaja ose personat privatë, pro ose kundra gjyqtarëve dhe prokurorëve. Vëzhguesit ndërkombëtarë kanë të drejtën të marrin të gjithë informacionet menjëherë, të dhënat për persona dhe dokumentet e nevojshme, me qëllim monitorimin e procesit të rivlerësimit në të gjitha nivelet dhe fazat. Krahas skanimit, ILDKP, nis menjëherë kontrollin e pasurive të kryeprokurorit Adriatik Llalla, anëtarëve të Gjykatës së Lartë dhe Gjykatës Kushtetuese. Të gjitha gjetjet e konstatuara nga inspektorët e ILDKP, së bashku me mendimet dhe provat që do të paraqesin prokurorët dhe gjyqtarët e SHBA-BE, për çdo dosje pasurie të kontrolluar, do të reflektohen në një raport, i cili do t’u përcillet organeve të Veting-ut. Në fund të raportit, për çdo gjyqtar apo prokuror, ILDKP do të konstatojë nëse deklarimi i pasurisë është i saktë, nëse ka mungesë të burimeve financiare, është kryer fshehje e pasurisë, është kryer deklarim i rremë apo subjekti gjendet në situatën e konfliktit të interesit. Shkalla e parregullsive dhe e pasurisë së pajustifikuar do të jetë përcaktuese për fatin e gjyqtarit apo prokurorit.
