Policia e Shtetit dyshon se shkak për helmimin e 140 mbështetësve të PD-së në mitingun elektoral të ditës së djeshme janë ndotja e ajrit dhe ndriçimi i fortë.
Në cilësinë e provës materiale policia ka sekuestruar 12 prozhektorët e ndriçimit që janë përdorur në 4 platforma gjatë mitingut të Partisë Demokratike dy ditë më parë.
Policia sqaron se ndotja e ajrit përmes çlirimit të tymrave, gazrave dhe lëndëve të tjera toksike radioaktive e bërë tej kufirit të normave të lejuara, kur vepra nuk përbën kundërvajtje administrative, përbën kundërvajtje penale dhe dënohet me gjobë ose me burgim gjer në dy vjet dhe me 10 vjet n.q.s shkakton pasoja të rënda për jetën e shëndetin e njerëzve.
Prokuroria vijon hetimet intensivisht për zbardhjen e ngjarjes dhe zbulimin e shkaqeve të helmimit.
