Marrë nga faqja e fcb e Erion Dasho
Me inagurimin e Qendrës Toptani shtohen mundësitë për turizëm të tipit të ri, turizëm Makbethian.
Përfytyroni: Autobuzi me turistë niset nga Hoteli Plaza me shoqëruesin që shpjegon: “Kjo është qendra Toptani. Esat Toptani u vra në 1920 në Paris”.
Pas dy minutash: “Ky është sheshi Avni Rustemi. Rustemi ishte ai tipi që vrau Esatin”.
Pas pesë minutash: “Ky është bulevardi Zogu I. Ahmet Zogu ishte kushëri me Esatin dhe vrau Avniun për t’u hakmarrë”.
Pas pesë minutash: “Ky është sheshi Fan Noli. Fan Noli ishte prift, por kur Ahmet Zogu vrau Avniun, bëri revolucion dhe mori pushtetin. Ahmetin e dëbuan dhe e dënuan me vdekje në mungesë. Veçse Ahmeti u kthye pas gjashtë mujash, mori pushtetin, u bë mbret dhe dënoi Fan Nolin me vdekje në mungesë. Fan Noli iu kthye punës së priftit”.
Pas dy minutash: “Kjo është piramida, muzeu i Enverit që mori pushtetin dhe shpalli Avniun dhe Nolin heronj, kurse Esatin dhe Ahmetin armiq. Kjo histori vazhdoi për 45 vjet”.
Kthen kokën nga ana tjetër: “Kjo është qeveria dhe Kuvendi i Shqipërisë. Këta i ranë shkurt. I shpallën Esatin, Avniun, Ahmetin dhe Nolin të gjithë heronj, kurse Enverin e shpallin me 8 vjet hero dhe 8 vjet armik”.
Dhe kështu mbaron me happy-end historia e Shqipërisë së pavarur…
