Ndërsa kryeministri Haradinaj nuk është deklaruar ende për kërcënimin që i ka bërë presidenti i Turqisë, kryeparlamentari Veseli i ka dalë në mbrojtje kryeministrit kosovar.
Kreu i Kuvendit është shprehur i befasuar me deklarimet e presidentit të Turqisë, Rexhep Taip Erdogan, duke thënë se veprimet e institucioneve të Kosovës janë sovrane dhe si të tilla, nuk mund t’u nënshtrohen presioneve të jashtme.
“Deklarimet e tilla nuk i kontribuojnë forcimit të miqësisë dhe bashkëpunimit të ndërsjellë, për çka vendi ynë ka qenë dhe është i përkushtuar. Veprimet e institucioneve të Republikës së Kosovës janë sovrane dhe si të tilla, nuk mund t’u nënshtrohen presioneve të jashtme”, ka thënë Kadri Veseli, kryetar i Kuvendit të Kosovës.
Ndërsa, në një intervistë për KosovaPress, kreu i Kuvendit ka thënë se të gjithë duhet të marrin përgjegjësi për skandalin e dëbimit të shtetasve turq nga Kosova. Kryetari i PDK-së, ka thënë se ai, si bartës i koalicionit, do ta shkarkonte ministrin brenda dy minutave, po të ishte i partisë së tij, duke shtuar se ai nuk ka qenë i informuar për asgjë rreth aksionit.
Ndërkohë, pas protestave para Ambasadës së Turqisë në Prishtinë, Ministria e Punëve të Jashtme e Turqisë i ka rikujtuar Kosovës se siguria e shtetasve turq, misioneve, zyrtarëve dhe kompanive turke, është në rend të parë përgjegjësi e Kosovës si shtet pritës.
Kjo ministri i konsideron provokuese raportimet e mediave për rastin, veçanërisht ato se të arrestuarit janë mbajtur në Ambasadën e Turqisë në Prishtinë.
Institucionet e Kosovës arrestuan dhe më pas i deportuan 6 shtetasit turq në Turqi. Kjo bëri që kryeministri Haradinaj të kërkojë lirimin nga pozita të ministrit të Brendshëm, Flamur Sefaj, dhe drejtorit të AKI-së, Driton Gashi.
Këta dy zyrtarë ende nuk kanë folur për rastin e as kërkesën që ua ka bërë kryeministri.
