Kur Qeveria e Ramush Haradinajt kishte marrë vendim për taksë prej 100 për qind ndaj produkteve me origjinë nga Serbia dhe Bosnja e Hercegovina, Bashkimi Evropian kishte reaguar prej të parëve. Ai kishte vazhduar me presion konstant ndaj Haradinajt për ta pezulluar një vendim të tillë, me qëllim të vazhdimit të dialogut për normalizim të raporteve Prishtinë – Beograd.
Megjithatë, një gjë e tillë nuk po ndodh tani kur Ramush Haradinaj ka dhënë dorëheqje të parevokueshme nga posti i kryeministrit dhe në Kosovë po diskutohet rreth datës së zgjedhjeve të reja, apo edhe mundësisë për krijimin e një “qeverie teknike”, ide që nuk po përkrahet nga askush.
Zëdhënësja e Bashkimit Evropian, Maja Kocijancic, në një përgjigje për Gazetën Express, ka thënë se janë në dijeni për zhvillimet në Kosovë, megjithatë thotë se s’kanë asnjë koment për çështjet që kanë të bëjnë me zgjedhjet e reja.
“E kemi parasysh vendimin e kryeministrit Ramush Haradinaj për të dhënë dorëheqje, bazuar në specifikat e letrës së tij të dorëheqjes”, ka thënë zëdhënësja e BE-së.
Ndërkohë sa i përket asaj se a duhet Kosova të shkojë në zgjedhje të parakohshme, apo të krijojë një qeveri teknike, Kocijancic ka thënë se në këtë fazë nuk kanë ndonjë vlerësim.
“Nuk kemi ndonjë koment shtesë në këtë fazë”, ka potencuar ajo.
Mbase kjo mungesë e qëndrimit të BE-së për zhvillimet në Kosovë mund të vijë si pasojë e ndryshimeve të brendshme që janë bërë së fundi në Bruksel, pas zgjedhjeve të reja. Përfaqësuesja e lartë e BE-së, Federica Mogherini, është zëvendësuar nga spanjolli Josep Borell, i cili do të jetë edhe kryenegociatori i ri në dialogun Prishtinë – Beograd dhe do të komandojë politikën e jashtme të Unionit Evropian.
Ramush Haradinaj ka dhënë dorëheqje të parevokueshme nga posti i kryetarit të Qeverisë, pas ftesës që ka marrë nga Gjykata Speciale e Hagës për t’u intervistuar si i dyshuar.
Intervistimi i Haradinajt ka përfunduar sot, ndërkohë bashkë me të në Hagë ka qëndruar e është intervistuar edhe ish-zëdhënësi i UÇK-së, Jakup Krasniqi.
Derisa Haradinaj e Krasniqi qëndrojnë në Hagë, në Kosovë partitë politike janë duke i bërë matematikat për zgjedhjet e parakohshme.
RTK-ja, e thirrur në burime brenda Presidencës, ka raportuar që zgjedhjet e parakohshme do të mbahen më 8 shtator të këtij viti.
Fakti që zgjedhjet e reja mund të mbahen në fillim të shtatorit, tregon edhe për mundësinë e shtyrjes së takimit të paralajmëruar Prishtinë – Beograd për shtator.
Dushan Janjiq, analist serb, ditë më parë në një intervistë për Gazetën Express pati deklaruar që pret një takim ndërmjet Kosovës dhe Serbisë në muajin tetor./GazetaExpress/
