Braho: Greqia nuk e kapërdin dot që Çamëria është shqiptare dhe historia e saj është një njollë turpi për historinë e tyre. Madje, ambasada greke paraqiti sot ankesë në Bashkinë e Tiranës, përse janë përdorur gurët nga Çamëria për Sheshin Skënderbej.
Ambasada greke në Shqipëri ka paraqitur ankesë në Bashkinë e Tiranës, pasi në Sheshin Skënderbej janë vendosur disa gurë që janë marrë nga Filati i Çamërisë.
Zyrtarja e lartë e PDIU-së, Vjollca Braho e ka cilësuar të turpshme ankesën e Greqisë drejtuar Bashkisë së Tiranës.
Braho u shpreh se këto lëvizje e bëjnë më të fortë nismën dhe qëndresën e PDIU-së që atdheu është mbi gjithçka dhe nuk mund ta lëmë më të nëpërkëmbet fati i tij.
Statusi i plotë i Brahos
Vetëm pak ditë na ndajnë nga inaugurimi i Sheshit Skënderbej! Sheshit simbol të kryeqytetit dhe Shqipërisë! I konceptuar që në fillesë si sheshi i të gjithë shqiptarëve, për ndërtimin e tij janë përdorur gurë nga të gjitha trevat Shqiptare! Pjesë e pandarë e këtij mozaiku janë edhe gurë të marrë nga Filati, në Çamëri!
Fatkeqësisht, fqinji ynë Greqia nuk e kapërdin dot që Çamëria është shqiptare dhe historia e saj është një njollë turpi për historinë e tyre. Madje kanë paturpësinë që të dërgojnë Ambasadoren e tyre në Tiranë, e cila sot po paraqet ankesë në Bashkinë e Tiranës përse janë përdorur gurët nga Çamëria për Sheshin Skënderbej.
Lëvizja e përfaqësues së lartë të shtetit grek e bën akoma më të domosdoshme nismën dhe qëndresën e Partisë, Drejtësi, Integrim dhe Unitet! Sot të gjithë shqiptarët janë me Çamërinë sepse e kanë kuptuar që për PDIU-në atdheu është mbi gjithçka dhe nuk mund ta lëmë më të nëpërkëmbet fati i tij!
Ne kemi Veç një Atdhe!
