Pero Pejiç dhe Hamdi Salihi do të vazhdojnë të konkurojnë për “topin e artë”, megjithëse tani janë 34 dhe 33 vjeç. Të tjerët pothuajse nuk kanë fare sulmues
Duke ndjekur merkaton e verës të skuadrave tona të kategorisë Superiore, mund të vësh re lehtësisht një varfëri totale në cilësi, megjithëse ata që kanë marrë përsipër të ndërtojnë skuadrat e sezonit të ri, po e amortizojnë paaftësinë e tyre me një fushatë publicitare të gënjeshtër. Sulmuesit pothuajse mungojnë fare dhe nuk ka dyshim që “këpuca e artë” do të ndahet midis Pero Pejiç të Kukësit dhe Hamdi Salihit të Skënderbeut. Por Pero, pikërisht në ditën kur ne duhet të festojmë 104 vjetorin e pavarësisë do të mbushë 34 vjeç dhe ndoshta vetëm në kampionatin tonë mund të shënosh njëlloj, duke vrapuar gjithnjë e më pak.
Ndërsa 52 ditë më vonë është Salihi që do të bëhet 33 vjeç, por edhe ai mbetet favorit, pasi rivalët ose kanë gabuar në përzgjedhje, ose nuk i kanë fare mundësitë financiare për të gjetur dikë me karakteristika qoftë edhe të përafërta me dy bomberat e mbetur në territorin e Shqipërisë. Partizani e ka pasur marshin e gabimit më të madh, pasi Volas erdhi dhe iku, Ekuban nuk ka shumë konfidenca me golin, ndërsa pritet një izraelit, Ben Azubel, për t’i plotësuar këtë boshllëk të madh klub të kuq. Tirana ka sjellë një komunitet afrikanësh që nuk lënë shumë shenjë, por edhe ata mund të mos i ketë pas një dënimi të mundshëm nga UEFA, pasi klubi ka humbur gjyqin e rradhës ndaj futbollistit bullgar, Martin Kavdanski, të cilit erdhi e iku dhe nuk i dhanë asnjë lek. Ndërsa Magani i Flamurtarit i ka mahnitur të gjithë, duke sjellë sërish në skuadër kroatin Bushiç, një pykë që e kishte edhe te Tirana dhe gjatë të gjithë kampionatit i shënoi vetëm një gol. Ndërsa të tjerët kanë buxhete shumë të ulta dhe sigurisht që janë duke kërkuar në tregje mjaft të lira.
