Ronaldo – Bejl dhe Toni Kros – Grizman, tre “blankos” dhe një “kolçonero” për një tjetër kurorë europiane
Europiani i Francës ka hyrë në javën e fundit. I mungojnë vetëm tre ndeshje, dy gjysmëfinalet dhe finalja, për të përcaktuar më pas kampionen e radhës së kontinetit të vjetër. Dhe komandon Madridi. Portugali – Uells simbolizohet si sfida midis Kristiano Ronaldos dhe Garet Bejl, pasi të dy do të bëjnë maksimumin për të tërhequr skuadrat e tyre drejt historisë. Aq më shumë, që nga paraqitja e tyre në orët e fundit të europianit mund të varet Topi i Artë i sezonit të ardhshëm. Por do të ishte vërtetë e jashtëzakonshme një finale e mundshme për Uellsin e drejtuar nga Koleman.
Ndërsa Gjermania dhe Franca do të vënë përballë Toni Kros dhe Antuan Grizman. Të zotët e shtëpisë duken shumë të karikuar pas fitores 5-2 ndaj Islandës, por ndoshta tani do të bëjnë ndeshjen e parë të vërtetë, pas fazës së grupeve ndaj Zvicrës, Rumanisë dhe Shqipërisë (me këta të fundit që e vunë më shumë në vështirësi), Irlandën në 1/8 dhe Islandën në çerekfinale. Nga ana tjetër, një Gjermani në emergjencë pas ndeshjes kundër Italisë, me shumë titullarë të pamundur për të qenë në fushë për shkak dëmtimesh dhe pezullimesh dhe mbi të gjitha e konsumuar fizikisht. Pra dy gjysmëfinale, ku janë tre yje të Realit dhe sulmuesi i Atletikos. Janë dy ndeshje që ngjajnë me një derbi spanjoll, si ai i finales së fundit të Champions League, ku në fund fitoi një francez… Zinadin Zidan.
