Ministri i Industrisë tha se ka propozuar disa lehtësira pranë ministrisë së Financave
Ministri i Energjisë dhe Industrisë, Damian Gjiknuri, tha sot se industria minerare është në vështirësi për shkak të rënies së çmimit të mineraleve në tregjet ndërkombëtare. Gjatë një vizitë në një vizitë në fabrikën e çimentos në Krujë, Gjiknuri tha se ka paraqitur pranë ministrisë së Financave një plan lehtësirash për këtë Industri. “Kuptohet se industria minerare ka dhe vështirësitë e saj.
Tashmë e kemi bërë me dije se jemi duke diskutuar me industrinë minerare për lehtësira, qoftë fiskale apo të tjera, për mënyrën e llogaritje së shumë elementëve financiarë pasi kushtet e tregjeve minerare janë mjaft të vështira.
Ministria e Energjisë ka ndërmarrë disa hapa, jo më larg se sa dje kemi propozuar disa masa për Ministrinë e Financave. Shpresoj që në të ardhmen e afërt të gjejmë një zgjidhje për këtë situatë emergjente për industrinë minerare. Kjo është industri jashtëzakonisht e rëndësishme për Shqipërinë dhe ka një zinxhir të tërë aktivitetesh që lidhen me të jo vetëm nga punësimi por edhe një numër i madh kontraktorësh që jetojnë me këtë industri. Duam të bëjmë çmos që kjo industri të mbijetojë për të pritur dhe ditët më të mira që janë rritja e çmimeve të mineraleve në tregjet ndërkombëtare”, nënvizoi z.Gjiknuri.
