Gazeta gjermane Bild ka publikuar gjashtë kaseta të reja përgjimesh të kreut të bandës kriminale të Avdylajve, Astrit Avdylaj me drejtues të lartë në Shijak dhe Durrës.
Në përgjime flitet për takime me krybashkiakun e Durrësit Vangjush Dako, për blerje dhe manipulim votash për punonjësit e administratës, për heqje të gjobave me një telefonatë, vendosjen e kandidatëve për deputetë në listën e PS…
Gazetari kryesor i politikës në këtë të përditshme, Peter Tiede i akuzuar si i blerë nga opozita në Shqipëri, është përgjigjur duke publikuar përgjimet e planit mafioz për blerjen e votave.
“Paratë e drogës po qeverisin vendin. Kur ‘Bild’ raportoi para pak kohësh për një transkriptim të përgjuar, në të cilin kryeministri Edi Rama e pyet një zyrtar vendor të zgjedhjeve, nëse gjërat kanë shkuar ashtu siç ishte rregulluar, qeveria u zemërua: ‘Bild’ është një gazetë e blerë, pretendimet (që në fakt bazohen në dokumentet e hetuesve shqiptarë dhe të Evropës Perëndimore) janë krejtësisht të pabaza. Edhe hetuesit shqiptarë e konfirmojnë vërtetësinë e telefonatave.
Por tani Bild ju sjell përgjimet telefonike, duke treguar se si përpara zgjedhjeve të vitit 2017, një baron famëkeq i drogës blen votat për Partinë Socialiste të Ramës. Ai siguron që një politikan i caktuar të futet në parlament. Ne po u tregojmë 6-të përgjime konkrete.
Rasti konkret është vetëm një nga dhjetëra anembanë Shqipërisë. Shumica e tyre – janë akoma nën qilim. Hetuesit që punojnë për këto raste ose janë heshtur, ose kanë ikur jashtë vendit”, shkruan gazetari Peter Tiede.
Në përgjimin e parë Astrit Avdylaj, kreu i grupit kriminal të Avdylajve në Shijak telefonon Ivo Docin, drejtorin e ndërmarrjes komunale të Ujësjellësit dhe të Kanalizimeve në qytetin e Durrësit, dhe e pyet atë lidhur me votuesit e opozitës (të Partisë Demokratike), që janë të punësuar në institucionin që Doci drejton, me qëllim që Astriti të vijë dhe “t’i shkundë pak”, në mënyrë që ata të votojnë për Partinë Socialiste, ose në të kundërt të pushohen nga puna. Toni nënshtrues i Docit ndaj bosit të krimit, Astrit Avdylaj, tregon për fuqinë që ky i fundit zotëron dhe për përgjegjësitë që ai ka patur në fushatën e PS-së.
Në përgjimin e dytë Astrit Avdylaj, kreu i grupit kriminal të Avdylajve në Shijak telefonon kryebashkiakun e Shijakut për të caktuar një takim me të, me Vangjush Dakon dhe me “Lirin” (Ilir Ndraxhi), një person që grupi kriminal i Avdylajve kërkon që të vendoset si kandidat i PS-së. Takimi mbahet me një synim: finalizimi i marrëveshjes që Ilir Ndraxhi do të vendoset si kandidat për deputet i PS-së në Durrës, duke përfaqësuar interesat e grupit kriminal të Avdylajve, në këmbim të mbështetjes së plotë të këtij klani në fushatën elektoralë të PS-së në Durrës. .” Do takohemi me një kafe, unë, ti, Liri, Vangjushi” thotë Avdylaj gjatë bisedës.
Në përgjimin e tretë tregohet se si Avdylaj ndikon për vendosjen e kandidatëve për deputetë në listën e PS. Në rastin konkret bëhet fjalë për Ilir Ndraxhin. Në përgjim dëgjohet Astrit Avdylaj kreu i bandës kriminale së Avdulajve në Durrës e Shijak duke biseduar më Arjan Ndraxhin ku i tregon se i ka kërkuar kryeministrit Edi Rama nëpërmjet Vangjush Dakos kandidimin e vëllait të tij, Ilir Ndraxhin, aktualisht deputet i PS-së në Kuvendin e Shqipërisë. Bëhet fjalë pë fushatën për zgjedhjet parlamentare të vitit 2017. Avdylaj i thotë se ka marrë një telefonatë ‘nga lart’ duke ia siguruar kandidimin e Ilir Ndraxhit për deputet dhe ‘i betohet’ se do ta surprizojë ‘të gjatin’ me 10 me 0.
Në përgjimin e katërt kreu i grupit kriminal të Avdylajve në Shijak telefonon kandidatin e PS-së për bashkinë e Shijakut, Elton Arbanën. Me një ton të zemëruar, Avdylaj telefonon Arbanën dhe i thotë atij se inspektorët e INUK janë duke u vendosur gjoba disa njerëzve në Sukth dhe se ai nuk po arrinte dot që të komunikonte me “Gjushin” ( Vangjush Dakon) për t’i kërkuar atij që t’i ndalonte, për arsye se kryebashkiaku ndodhej bashkë me kryeministrin Rama për një udhëtim në Zvicër. “I thuaj atij b*thq*mit, se s’dua të shqetësoj Vangjushin se është me Edin në Zvicër”, i drejtohet Avdylaj Elton Arbanës.
Në përgjimin e pestë koka e grupit kriminal të Avdylajve në Shijak telefonon Gjushin (Vangjush Dakon, kryetar Bashkie në Durrës). Gjatë telefonatës Avdylaj ndodhet në zyrën e rregjistrimeve të pronave në Durrës në prezencën e shefit të zyrës, Vath Alla. Në këtë përgjim duket qartë lidhja e ngushtë që Dako dhe Avdylaj kanë më njëri tjetrin. Astrit Avdylaj e dinte që Vangjush Dako kishte qenë deri vonë në një takim me kryeministrin Edi Rama. Ai i thotë Dakos të anullojë planet e tij për të udhëtuar në Ishëm, që të sigurohet që puna e tij në zyrën e rregjistrimeve. Kryebashkiaku Dako bie dakort dhe i anullon planet.”
Videot mund ti gjeni duke klikuar këtu.
