Sekretari i përgjithshëm i Partisë Demokratike e ka quajtur të turpshme dhe të dëmshme përgjigjen e kryeministrit Edi Rama në lidhje me thirrjen e ambasadores së SHBA-ve në vendin tonë për mospërfshirjen e kriminelëve në listat zgjedhore.
Rama deklaroi ditën e sotme se partia e tij do të bëjë gjithçka ka në dorë për të mos përfshirë në lista njerëz me të shkuar kriminale, por nëse dikush gënjen në formularin e dekriminalizimit, atëherë përgjegjësia është individuale.
Në lidhje me këtë deklaratë të Ramës, ka reagur dhe Bardhi i cili thekson se pas 8 vitesh në të cilat Rama shkatërroi ekonominë dhe vendin tonë, tani ai po shkatërron edhe marrëdhëniet tona me Shtetet e Bashkuara të Amerikës dhe Bashkimin Evropian.
“Përgjigja e Ramës ndaj kërkesës së SHBA, Gazment Bardhi: E turpshme dhe e dëmshme!
Përgjigja e Ramës ndaj kërkesës së SHBA-ve që partia e tij të mos përfshijë kriminelë në lista- është e turpshme dhe e dëmshme. Edhe një herë Rama e turpëroi Shqipërinë dhe dëmtoi statusin e saj ndërkombëtar.
Pas 8 vitesh në të cilat Rama shkatërroi ekonominë dhe vendin tonë, tani ai po shkatërron edhe marrëdhëniet tona me Shtetet e Bashkuara të Amerikës dhe Bashkimin Evropian.
Për të sjellë ndryshimin dhe një të ardhme më të mirë në Shqipëri, ne duhet të largojmë Ramën – dhe kjo është pikërisht ajo që populli shqiptar do të bëjë në 25 Prill!” deklaroi Bardhi.
