Katër të rinj shqiptarë janë arrestuar ditën e sotme në Greqi. Për grupet kriminale, fshehja e drogës në ambiente ku prodhohen apo shiten produkte ushqimore është shndërruar në një metodë të re për t’u fshehur. Ditët e fundit policia greke ka gjurmuar një kasaphane në zemër të Athinës, ku përveç shitjes së mishit shpërndahej edhe drogë. Autoritetet helene kanë vënë në pranga katër shtetas shqiptarë të moshës 26, 35, 38, 48 vjeç dhe kanë sekuestruar 5 kg e 775 gram marijuanë, 70 gr kokainë, 11355 euro, tre celularë dhe një peshore elektronike në cilësinë e provës materiale.
Sipas burimeve, 35-vjeçari konsiderohet kreu i grupit, i arrestuar edhe në 2012-ën për grabitje dhe çështje droge. Gjate kontrollit të banesave të tyre nuk u gjet asgjë e jashtëligjshme. Ndërsa ai është shoqëruar në komisariat ku po merret në pyetje për të zbardhur më shumë rreth grupit me të cilin bashkëpunonte.
