Vazhdon refuzimi i ministrit ndaj banorëve të fshatit të shkatërruar nga 2600 shpërthimet e Bankers Petroleum. Në vend të tij, Niko Peleshi premton vendimin absurd, dëshpërblimin e banorëve me paratë e taksapaguesve shqiptarë.
Ministri i Energjitikës, Damian Gjiknuri, vazhdon të refuzojë banorët e Zharrëzës, para oborrit të ministrisë së tij. Kanë udhëtuar nga Zharrëza deri në Tiranë, por inati i Damian Gjiknurit ndaj tyre është edhe më i madh se mundimet e grevistëve që po qëndrojnë para derës së tij, pa çadër.
Gjiknuri vazhdon t’i refuzojë ata. Nuk i përfilli për katër vjet, derisa ata u nisën në udhëtimin e tyre epik për t’u stacionuar poshtë ballkonit të zyrës së tij. Ai vazhdon t’i refuzojë. Me siguri ka një arsye shumë të fortë që i shmanget përballjes sy më sy 
me ta. Ndoshta ka frikë.
Ndoshta ka frikë të përballet me ta, sepse i ka braktisur, kur nuk bëri as përpjekjen më të vogël për të ndalur tërmetet e tmerrshme në shtëpitë e tyre që nxorën ujin e zi poshtë shtretërve të fëmijëve të Zharrëzës. Ata i kanë humbur të gjitha. Uji është helmuar, banesat janë shkatërruar, toka nuk prodhon dot më. Banorët e Zharrëzës nuk kanë asnjë zgjidhje tjetër, veçse të qëndrojnë aty poshtë ballkonit të Gjiknurit, derisa ai të dalë t’iu përgjigjet për tërmetet e naftën që kanë shkatërruar fshatin e tyre.
Ndërsa Rama del live në facebook e iu thotë banorëve të Zharrëzës se së shpejti do udhëtojë në fshatin e tyre për t’i takuar. Por për çfarë?! Ata janë në Tiranë, pak metra larg kryeministrisë. Me një ecje sportive, siç bën ndonjëherë, kur ka protesta vërdallë, kryeministri mbërrin aty për pesë minuta, e ndoshta e detyron edhe Damianin të zbresë poshtë ballkonit.
Ndoshta Rama do shkojë atje, në vendin e krimit për të parë nga afër gërmadhat e një fshati ku s’ka më jetë. Atje ku ishte katër vjet më parë e ku premtoi bashkë me Gjiknurin e të tjerë drejtues të së majtës në fushatën e 23 qershorit:
PREMTOJMË:
– Vendosje e të drejtës sovrane te shtetit shqiptar mbi naftën e nxjerrë nga nëntoka shqiptare.
– Politika dhe praktika që kthejnë naftën në pasuri reale të shqiptarëve, duke përmirësuar dhe bilancin e rezervave efektive të naftës në vend.
– Politika në shërbim të rritjes së investimeve private në sterre dhe det në kërkim-zbulimin për shtimin e rezervave të naftës nga vendburimet e reja.
– Analizim ligjëror dhe kontroll zbatimit të kontratave hidrokarbure, liçensave dhe dhënies së lejeve.
– Përmirësim i legjislacionit dhe praktikave të dhënies së lejeve konçesionare duke synuar efikasitet dhe transparencë.
– Rikonceptim i rolit, misionit dhe kapaciteteteve administrative e profesionale të Agjencisë Kombëtare të Burimeve Natyrore.
Asnjë nga këto premtime nuk është mbajtur. Përkundrazi, situata është përkeqësuar skajshëm dhe nuk duhet shumë për ta besuar, veçse Zharrëza. Atje janë shkatërruar 70 shtëpi, qysh prej kohës kur Rama qeveris vendin. Zharrëza është tronditurr nga 2600 shpërthimet e “Bankers Petrolium” për të nxjerrë naftë. Minsitria e Energjitikës nuk ka asnjë fjalë për të thënë për këtë situatë, ashtu siç nuk ka pasur për tre vjet.
Të braktisur nga kryeministri e ministri Gjiknuri, banorët e Zharrëzës janë përfillur nga zëvendëskryeministri Niko Peleshi. Ai i ka takuar dy ditë më parë dhe u ka premtuar banorëve përshpejtimin e procesit, sipas tij, të nisur prej kohësh nga qeveria për dëmshpërblimin e tyre.
“Nuk kemi pse t’i nxisim drejt një sakrifice të panevojshme. Nuk ka më pika që nuk janë adresuar nga kërkesat e banorëve. Ne, si qeveri nuk është se po prisnim këtë protestë për t’u zgjuar për këtë çështje. Këto pika janë tek raporti i grupit të punës. Këto bisedime na vlejtën për ta bërë më shpejtë këtë. Brenda javës së ardhshme, gjithçka që raporti ka kërkuar dhe detyruar për të gjitha institucionet do të nisë të zbatohet. Brenda javës që vjen do të vendosim për banesat që do të rezultojnë edhe pas rivlerësimit si të dëmtuara rëndë, të pabanueshme për dëmshpërblimin të plotë, jo vetëm nga buxheti i shtetit, por edhe nga kompania”.
Pasi tha këto, Peleshi e quajti të pavlerë vazhdimin e protestës. Por, protestuesit vazhdojnë, sepse nuk besojnë më. Ata presin të nisë zyrtarisht dëmshpërblimi, pastaj të largohen nga greva.
Edhe nëse do të vijë shpejt ai moment, Niko Peleshi, Damian Gjiknuri dhe Edi Rama duhet të sqarojnë publikisht, për cilat arsye duhet që dëmet në Zharrëz t’i paguajnë taksapaguesit shqiptarë? Kanë detyrimin të sqarojnë për cilat arsye kompania “Bankers Petrolium” lëshon me mijëra herë tërmetet e naftës dhe nuk ka as frikën më të vogël, por me arrogancë vazhdon të refuzojë dëmshpërblimet për banorët e fshatit të shkatërruar. Ndoshta këtu e ka fillin edhe frika e Gjiknurit për t’u përballur me protestuesit e Zharrëzës.
