Lidhur me vendimin e ministres së Mbrojtjes, Olta Xhaçka ku lajmëroi mbrëmjen e djeshme marrjen e aeroportit të Rinasit në kontroll nga Forcat e Armatosura, ka reaguar sekretarja e Përgjithshme e Partisë për Drejtësi, Integrim e Unitet, Mesila Doda.
Përmes një postimi në facebook, Doda deklaron se kjo është realisht shpallje e gjendjes së jashtëzakonshme, duke shtuar se nuk ka rrugë tjetër përveç largimit të kryeministrit.
Postimi i plotë
Sot Forcat e Armatosura të Republikës së Shqipërisë kanë marrë në kontroll Aeroportin e Rinasit. Kjo është realisht shpallje e gjendjes së jashtëzakonshme dhe faktimi i supremacisë së krimit në vend. Kujtojmë se lëvizja e këtyre forcave nuk mund të bëhet në asnjë rast pa një vendim të Parlamentit të Shqipërisë.
Vendimi i sotëm tregon atë që kemi muaj që e themi, se qeveria ka humbur luftën me krimin sepse është vetë nën thundrën e tij dhe e lidhur me njëmijë fije me të dhe po sot ajo gjendet në një shkelje flagrante kushtetuese.
Shteti shqiptar sot është në pikën e tij më delikate, në një krizë të thellë institucionale, ekonomike e sociale. Rrugë tjetër përveç largimit të kauzës së kësaj gjendje që është kryeministri i vendit, nuk ka. Shqipëria duhet të çlirohet njëherë e mirë nga krimi dhe korrupsioni që po vret çdo grimcë shprese e normaliteti në vend.
