Kreu i grupit parlamentar demokrat, Enkelejd Alibeaj i është përgjigjur kryeministrit Edi Rama për gjuhën banale që përdoruri ditën e sotme në Kuvend. Alibeaj shkruan në një postim në Twitter se gjuha e Ramës nuk habit më askënd, teksa dënoi edhe faktin se kryeministri nuk u shpreh për gjenocidin serb në Kosovë.
“Kryeministri që paska veshur sot kostumin e nacionalizmit nuk gjeti dot asnjë fjalë për genocidin serb në Kosovë. Përgjërohet sot për Kosovën, që është sot e pavarur falë SHBA-ve dhe aleatëve, ndërsa vetëm 4 ditë më parë shpaloste teoritë e sovranitetit. Sa për gjuhën e shthurur kjo nuk habit më askënd. Veç ngjall neveri tek ata që janë dhe sillen ndryshe dhe nostalgji tek ata që janë në formë dhe përmbajtje të ngjashëm. Ndërkohë asnjë fjalë për genocidin serb në Kosovë”, shkruan Alibeaj.
