Të rinjtë e PDIU-së “pushtojnë” oborrin para maqedonasve, iu bashkohet edhe ligjvënësja e kësaj partie, Mesila Doda, e cila ka një thirrje për politikën shqiptare në të gjitha trojet: “Ne jemi një komb dhe kemi vetëm një atdhe dhe ky atdhe e ka qendrën në Tiranë, e ka rrezatimin e tij në Shkup, Prishtinë, Çamëri e kudo ku ka hapësirë shqiptare.”
Droni me flamur mbi çatinë e Ambasadës së Maqedonisë, ishte padyshim një ndër detajet më të bukura të protestës së të rinjve të PDIU-së, sot para selisë diplomatike të vendit fqinj. Ata protestojnë në mbështetje të të drejtave të shqiptarëve të Maqedonisë , të cilat po shkelen dhunshëm nga politika e Shkupit. Të rinjtë kanë shprehur mbështetjen e tyre ndaj shqiptarëve të Maqedonisë dhe i kanë bërë thirrje klasës politike shqiptare, që bazuar në Kushtetutën e vendit t’i dalin për zot vëllezërve shqiptarë të atjeshëm.
Protestës entuziaste të të rinjve të PDIU-së i është bashkuar edhe ligjvënësia e kësaj partie, Mesila Doda, e cila në fjalën e saj ka ndezur situatën: “Jemi një komb dhe kemi vetëm një atdhe!”, ishte fjalia që shkaktoi entuziazëm tek të rinjtë protestues para Ambasadës së Maqedonisë. Doda i bëri thirrje të gjithë shqiptarëve të mos kenë frikë për të qenë të gjithë të bashkuar.
“Ne jemi një komb dhe kemi vetëm një atdhe dhe ky atdhe e ka qendrën në Tiranë, e ka rrezatimin e tij në Shkup, Prishtinë, Çamëri e kudo ku ka hapësirë shqiptare. Falenderoj me zemër të gjithë të rinjtë e PDIU-së dhe gjithë të rinjtë e tjerë që na janë bashkuar në këtë aksion të jashtëzakonshëm në mbështetja të shqiptarëve të Iliriadës, Iliridës”, tha Doda.
Duke vlerësuar gjestin e të rinjve të PDIU-së, Doda iu drejtua të gjitha krahëve të politikës për të mbështetur vëllezërit shqiptarë në Maqedoni, të cilëve po iu shkelen rëndë të drejtat.
“Sot folën të rinjtë, ne politikanët kemi shumë pak zë për të folur sot, por i vetmi apel që unë sot dua të lëshoj është ky: Të gjithë politikanët, të të gjithë krahëve, Shqipërisë, Kosovës, ish-Republikës Jugosllave të Maqedonisë duhet të bëhen të gjithë bashkë për të mbështetur, për të mbajtur fort, për të mbajtur vëllezërit e tyre, të cilët sot janë pa të drejta, të cilat do duhet që t’i kishin dhe t’i gëzonin në respekt të Marrëveshjes së Ohrit. Por, sot kjo ka rënë. Sot, Presidenti i ish-Republikës Jugosllave të Maqedonisë ka nënshkruar fundin e këtij shteti. Ne mbetemi që të jemi vetëm në mbështetje të popullsisë shqiptare atje.
Nga ana tjetër do duhej që t’i themi edhe njëherë politikanëve të Shqipërisë, politikanëve të Kosovës, politikanëve të Malit të Zi, të gjithëve në hapësirën mbarëshqiptare ,mos kini frikë, punoni që të jemi të gjithë bashkë.
Nuk do jemi kurkund në qoftë se nuk do kemi një ekonomi të konsoliduar të gjithë bashkë, marrëdhënie më të ngushta, marrëdhënie kulturore, arsimore.
Ne jemi një komb dhe kemi vetëm një atdhe dhe ky atdhe e ka qendrën në Tiranë dhe e ka rrezatimin e tij në Shkup, Prishtinë, Çamëri e kudo ku ka hapësirë shqiptare!”, tha Doda.
