Populli shqiptar ka krijuar ndoshta arkivin më të madh të fjalëve të urta, që kanë si subjekt kryesor qentë. Për të gjithë politikanët, mendimtarët dhe filozofët shqiptarë që duan të duken sa më “popullorë”, më poshtë po veçojmë disa nga fjalët e urta, të cilat mund t’i përdorin pa patur frikë se mos i akuzojnë se i kanë kopjuar nga dikush tjetër, për më tepër janë fjalë të urta që mund t’i përshtaten lehtësisht debateve të fundit politike.
- Qeni i pangopur të ha. SKRAPAR
- Qeni i tërbum do vra, se tërbon dynjanë. ELBASAN
- Qeni leh tek stani i tij. GJIROKASTER
- Qeni te shpia e vet gjithmonë asht trim. VERI
- Qentë le të lehin, karvanet të shkojnë përpara. JUG
- Qeni tund bishtin për të mbajtur miqësinë. KORÇË
- Qen i bardhë, qen i zi, qen i kuq, qen murrash, qen balash, qen është … JUG
- Mos shit qen të blesh këlyshë. KORÇË
- Trimërinë pas luftës e urtësinë pas kuvendit s’e ha as qeni. SKRAPAR
- Zuri qeni një lepur, nuk quhet zagar. JUG
- Ku do të dijë hëna se lehin qentë. VLORË
- Ç’i do qeni brekët. KORÇË
- Qeni kur kërkon të hajë të zonë, vritet. JUG
- Qeni edhe me sapun të lahet, era qen do të vijë. VLORË
- Buçja po nuk luajti bishtin, nuk i ngjiten qentë prapa. ELBASAN
- Njeriut iu bëj njeri, qenit bëniu qen. JUG
- Po kërciti dhëmbët qeni i qëndro me shkop në dorë. JUG
- Zë goje qenin, bëj hazër shkopin. GJIROKASTËR
- Qenit hidhi një kockë, të pushojë. SKRAPAR
