“Shqipëria do të qëndrojë në një trajektore të ulët të rritjes ekonomike”
Një krizë e pritshme e emigrantëve nga vendet në konflikt, niveli i ulët i eksporteve, përpjekjet për konsolidim fiskal dhe trajektorja e ulët e rritjes ekonomike. Këto janë parashikimet e FITCH për zhvillimet me ndikim në ekonominë shqiptare të viteve në vijim. “Shqipëria do të qëndrojë në një trajektore të ulët të rritjes ekonomike për vitet e ardhshme, mes nivelit të ulët të eksporteve dhe përpjekjeve të qeverisë për konsolidim fiskal”. Ky është parashikimi që bën BMI Research, pjesë e Fitch Group në një raport në fundit rendit rreziqet e shtetit shqiptar, nga pikëpamja politike, ekonomike, mjedisit të biznesit dhe risqeve operacionale. Raporti rekomandon që qeveria duhet të bëjë më tepër përpjekje për të zbatuar reformat strukturore në luftën kundër korrupsionit dhe nxitjen e përmirësimit, si hapat më të rëndësishëm për një Shqipëri të zhvilluar dhe konkurruese në rajon.
Një pikë tjetër që thekson raporti është se bilanci tregtar ka mungesa të mëdha. Nga ana tjetër, situate e ekonomisë greke shikohet si me ndikim të madh sa i takon nivelit të remitancave dhe kërkesës për eksporte.
Raporti bën një parashikim sipas të cilit kriza e emigrantëve sidomos atyre nga Siria, me të cilën po përballet Europa mund të luajë rol negative për Shqipërinë në muajt e ardhshëm. Rruga “mes Shqipërisë” mund të bëhet alternativë kryesore pasi vende të tilla si Hungaria, Kroacia dhe Sllovenia kanë ndërtuar gardhe kufitare për të ndaluar hyrjen e emigrantëve. Në një parashikim makroekonomik për vendin tonë, BMI Research ka vlerësuar se për vitet 2016 dhe 2017 rritja ekonomike do të variojë ndërmjet 3.1 dhe 3.6 për qind.
