Vetëm në 2015 borxhi u shtua me 6.66%, tashmë jemi në nivelin 72.2% të PBB-së
Mund të jetë pezull karrigia e ministrit por jo “transparenca”. Ministria e Financave ka shpërndarë për mediat një njoftim ku bën me dije se në vitin 2015 borxhi publik u rrit me 6.66 për qind duke shkuar në otal sa 72.2 e prodhimit kombëtar bruto. Tashmë Shqipëria ka borxh tek të huajt mbi një triliard lekë ose saktësisht sipas shifrës së financave 1,043.1 miliardë lekë.
Nga kjo shumë 99.91 për qind është marrë nga Qeveria Qëndrore dhe pjesa tjetër e “vockël” 0.09 për qind është marrë nga pushteti vendor.
Sipas Ministrisë së Financave 55.9 për qind e totalit të borxhit është në instrumenta financiare si bono thesari, obligacione, eurobond, të emetuara në tregun e brenshëm e të jashtëm. Pjesa tjetër 44.1 për qind janë kredi të marra nga qeveria ose të garantuara prej saj.
Borxhin e rritur të vitit 2015 e ka shkaktuar po sipas finanacave huamarrja e huaj në formën e kredive.
Në tregun e brendshëm huaja e qeverisë ka këtë ndarje: nga Banka e Shqipërisë 9.91 për qind e totalit të borxhit të brendshëm, nga bankat e tjera 58.2 për qind, nga institucionet jo bankare 17.1 për qind dhe nga qytetarët 14.8 për qind.
Ndërkohë për borxhin e jashtëm në njoftimin e ministrisë së finacave shkruhet “Borxhi i jashtëm përfaqëson 47.1 për qind të stokut të borxhit të Qeverisë Qëndrore ose 33.97 për qind të PBB. Në krahasim me fundin e vitit 2014 stoku i borxhit të jashtëm është rritur me 78.4 miliardë lekë, ose 19 për qind”. Rritja e borxhit është shoqëruar me një rritje të konsiderueshme edhe të interesave për të. Sipas MF “Për borxhin e jashtëm gjatë vitit 2015 u paguan 11.3 miliardë lekë interesa, tregues ky që ka ardhur në rritje si rezultat i pagesës së komisioneve per kredite e reja”.
