Në filmimin që po publikojmë paraqitet një nga KZAZ-të e Tiranës, ku një nga numërueset e një prej partive të ashtëquajtura “të mëdha” e grabit votën e PDIU-së dhe e transformon në votë të partisë së saj.
Filmimi nuk është kamera e fshehtë, por është marrë nga një kamera që është vendosur sipas ligjit nga Komisioni Qendror i Zgjedhjeve. Komisionerja në fjalë kryen vepër të rëndë penale dhe nëse zbatohet marrëveshja Rama-Basha e 18-19 majit zonjën e presin të paktën 7 vjet burg për vjedhje të votës.
Ky shirit është i tryezave, ku PDIU nuk kishte numërues, sepse ajo ka qenë e detyruar ta ndajë numëruesin me Partinë Republikane, e detyruar nga absurdi i ligjit zgjedhor.
Raste të tilla janë vërtetuar plot në shiritat e KQZ-së dhe tashmë mandati i kryetarit të PDIU-së Shpëtim Idrizi nuk ka asnjë arsye që mos të shpallet nga KQZ, sepse është sipër pragut 3 për qind dhe nuk ka më vend për asnjë lloj interpretimi. Por, është e tmerrshme të mendosh që vjedhja ndodh pa kurrfarë droje me kamera hapur dhe bëhet vetëm ndaj PDIU-së, gjë që të bën të mendosh se kemi të bëjmë me një strategji për ta lënë këtë parti pa ligjvënës në kryeqytet. Kjo shpjegon guximin e numërueses që duhet të ndiqet penalisht, por edhe të anëtarit të Komisionit Qendror të Zgjedhjeve, Bledar Skënderi, i cili e shpalli humbjen e mandatit të Shpëtim Idrizit pa u bërë fare përpunimi përfundimtar i të dhënave.
Gjithsesi mandati është atje, në kuti, si dhe vjedhja e tij ashiqare në sy gjithë Shqipërisë. Ky nuk është i vetmi filmim, por bëhet fjalë për një epidemi vjedhje që ka përfshirë pjesën më të mirë të KZAZ-ve të kryeqytetit. Këta patriotët e mëdhenj përse e kanë vetëm me shqiptarët e Çamërisë?
