Në Çim Peka Live, kryetarja e Autoritetit për Dosjet e Sigurimit, Gentiana Sula ka folur edhe atë që është kthyer në debatin e ditës, nëse është figura e Martin Camaj, bashkëpunëtor i Sigurimit të Shtetit.
Sula ka paraqitur në emision një fashikull pune me emrin e Martin Camaj, për të cilën thotë që nuk është dosja e një bashkëpunëtori, por e survejimit që Sigurimi i Shtetit i ka bërë Camajt për ta rekrutuar si bashkëpunëtor.
“Dosja është deklasifikuar vitin e kaluar në janar. Nuk bëhet fjalë për dosje bashkëpunimi, por për një fashikull pune. Subjekti është 2A, që do të thotë se ishte bërë gati për arrest. Dosja ka 200 faqe. Duhet lexuar me shumë kujdes. Martin Camaj ka qenë shumë inteligjent, ka pasur një shkollim të mirë. Sigurimi është përpjekur t’i vrasë moralisht. E thashë edhe njëherë që është dosje survejimi. Duhet të kuptojmë që një dokument sigurimi është një dokument i një policie politike, militare, e cila funksiononte mbi ligjin. Një policie që ka pasur jetën e njerëzve në dorë. Ka pasur nëj qëllim. Qëllimi ka qenë përpunimi. Një dokument nuk tregon kush është personi”, tha Sula.
Gjithashtu Gentiana Sula, ka folur edhe për rastet e kapura nga ky institucion në radhët e Kuvendit, Drejtësisë apo edhe Policisë.
“Interesi ka qenë i lartë. Sot deri tani që po flasim mund të numërojmë deri në 4 mijë dosje të zbardhura. Janë dy nene ku hetojmë, që është për zyrtarët e lartë dhe për të zgjedhurit vendorë. Unë mendoj që parandalimi ka funksionuar. Ajo që na shqetëson është fakti se institucioni jonë nuk lëviz kryesisht por lëviz me kërkesë. Ne kemi gjetur 2% të parlamentit të kaluar që kanë qenë të përfshirë në Sigurimin e Shtetit. Po ju them vetëm kaq që pas një personi janë gjetur 68 bashkëpunëtorë të Sigurimit të Shtetit. Reforma në drejtësi ka qenë një moment i mirë për të bërë një verifikim të figurave. Nga 480 dosje që kemi verifikuar në drejtësi, vetëm në 11 janë gjetur përfshirje në dosjet e Sigurimit. Nga 78 kandidatë në polici, 5 janë me dokumenta të Sigurimit të Shtetit. Sot që flasim kemi 9 procese gjyqësore ndaj nesh, ku 7 i kemi fituar dhe 2 janë në Apel”, tha Sula.
