Eurodeputetja e parë shqiptare në Parlamentin Europian është zgjedhur mbesa e Musine Kokalarit, Arba Kokalari.
Kreu i opozitës Lulzim Basha e ka cilësuar si një fitore historike mandatin e eurodeputetes Kokalari në Parlamentin Europian.
Basha shprehet se ndihet krenar dhe i lumtur për fitoren e Arbës.
“Të dashur miq, sapo urova në telefon, eurodeputeten e parë shqiptare, shqiptaro-suedezen Arba Kokalari që u konfirmua pak çaste më parë si fituesja e mandatit të eurodeputetes për partinë e moderatëve suedezë, simotrës tonë në Partinë Popullore Europiane! – shkruan Basha. – Natë e paharrueshme për Arbën dhe familjen e saj, natë fitore për Moderatët që konfirmuan 4 eurodeputetë dhe natë historike për të gjithë ne shqiptarët që inagurojmë me Arba Kokalarin praninë shqiptare në ulëset e Parlamentit Europian!
Krenar dhe i lumtur me fitoren e Arbës, ju shpreh mirënjohjen time të gjithë bashkatdhetarëve tanë në Suedi që me votën e tyre e mundësuan këtë moment historik! Dua po kështu t’ju falenderoj me mirënjohje në emrin tim dhe të Partisë Demokratike, të gjithë ju bashkatdhetarë të nderuar në vendet e BE që me votën tuaj për partitë simotra të PD, rikonfirmuat Partinë Popullore Europiane si forcën e parë politike në Parlamentin e ardhshëm Europian!”-shkruan Basha.
