Deputeti i Partisë Demokratike, Ervin Salianji, ditën e sotme ka zhvilluar një takim me demokratët e grupseksionit nr.8 në Korçë. Në një prononcim për mediat, Salianji është është shprehur se bashkimi real i PD nuk vjen nga numërimi fiktiv, por bashkimi rreth votës. Ai tha se ka vetëm një rrugë për të bashkuar PD-në dhe ajo nuk bëhet me procese të njëanshme dhe me njerëz që s’kanë kontribute.
“Nëse do të duan të bëjnë proces të njëanshëm nuk do ta realizojnë dot, ne do të mbrojmë siglën e PD, ne nuk jemi si ata që bëjmë beteja për të lëshuar gjërat, ka vetëm një rrugë për të bashkuar PD, jo me procese të njëanshme, jo me njerëz që s’kanë kontribute” – tha ai.
Salianji gjithashtu komentoi edhe për zgjedhjen e Presidentit të ri, i cili tha se ky është një debat i parakohshëm. Sipas tij, çdo emër i hedhur për konsum nuk i shërben interesave të opozitës në Shqipëri.
“Është një diskutimi i parakohshëm, kur të vijë një qëndrim në grupin parlamentar do të diskutohet, askush s’ka tagrin që të diskutojë në emër të grupit parlamentar, do të diskutohet edhe për qëndrimet që do të kemi për emrin e ri të presidentit. Çdo emër i hedhur për konsum nuk i shërben interesave të opozitës në Shqipëri. Duhet që t’i qëndrojmë parimeve. Nga PD në këtë rast nuk ka asnjë qëndrim pasi është qëndrim për të zhvendosur vëmendjen që ka bërë qeveria me rritjen e çmimeve, kur të kemi qëndrim për këtë do të bëhet publik zyrtarisht” – tha ai.
