Nga Rexhep Rada
Elbasani i bardhë nga zemra po shndërrohet në Elbasanin e bardhë nga kokaina. Nuk do e kisha menduar kurrë që qyteti ynë do përfundonte kaq keq. Jo vetëm në lagjet periferike, por edhe në çdo kurriz pallati apo rrugice në qendër të Elbasanit kundërmon era hashash.
Kjo çmenduri e përdorimit të narkotikëve ka marrë përmasa gjigande. Provoni të kaloni në rrugicat e kalasë, e do shikoni tymtarët që fshehin cigaret nëpër xhepa që në mesditë.
Imagjinoni çfarë bëhet pasi bie errësira. Madje dinë dhe rrugicat ku nuk ka kamera sigurie që të mallosen rehat. Por jo vetëm në Kala, por në çdo lagje situata është katastrofike.
Lokale të shumta ulin dritat në darkë dhe aty mblidhen “çunat e bardhë”. Përdoruesit e kokainës e dinë dhe veten “fisnike” në kategorinë e mallistëve, pasi thithin pluhur cilësor e të shtrenjtë.
Kjo është çmenduri që nuk mund të bëjmë sikur nuk e shohim. Po marrosen pas këtij trendi ku çdo ditë e më shumë, gjimnazistë e të rritur po konsumojnë bar masivisht.
Duhet urgjentisht një plan masash bashkëvepruese të policisë me institucionet dhe komunitetin për të ndalur këtë lajthitje të të rinjve.
Elbasani i luleve nuk mund të kthehet në Elbasanin e kanabisit.
